अमेरिकाले कुद्स फोर्सका नयाँ कमाण्डर मार्ने धम्की दिएपछि रुस र इरानको आपत्ति

विश्व

गृहपृष्ठ
विश्व
अमेरिकाले कुद्स फोर्सका नयाँ कमाण्डर मार्ने धम्की दिएपछि रुस र इरानको आपत्ति

अमेरिकाले कुद्स फोर्सका नयाँ कमाण्डर मार्ने धम्की दिएपछि रुस र इरानको आपत्ति

शुक्रबार, माघ १०, २०७६ एजेन्सी

कुद्स फोर्सका कमाण्डर इस्माइल गानी

एजेन्सी । रुस र इरानले कुद्स फोर्सका नयाँ कमाण्डरको हत्या गर्ने अमेरिकी धम्कीको कडा शब्दमा निन्दा गरेका छन् ।

अमेरिकी धम्कीलाई इरानको विदेश मन्त्रालयले ‘आतंकवाद’को संज्ञा दिएको छ । विदेश मन्त्रालयका प्रवक्ता सेयद अब्बास मोसाभीले हालै अमेरिकी प्रतिनिधि ब्रायन हुकले कुर्स फोर्सका नयाँ कमाण्डर मारिन सक्ने भनेर दिएको धम्कीलाई ‘राज्यले गर्ने आतंकवादको प्रचार’ भनेका छन् ।

‘अमेरिकी विदेश मन्त्रालयका अधिकारीको भनाइबाट अमेरिकी आतंकवादको भद्दा प्रदर्शन र प्रचार भएको छ’, मोसाभीले भने, ‘सरकार र सरकारी फौजलाई आतंकवादको लागि प्रयोग गर्ने मुलुकमा इजरालयपछि हालको अमेरिकी प्रशासन देखिएको छ ।’

आतंकवादको सहारा लिने अभिव्यक्तिबाट अमेरिका कमजोर, निराश र अलमलमा परेको प्रस्ट भएको समेत मोसाभीले बताए ।

त्यस्तै हुकको भनाइलाई रुसले समेत आलोचना गरेको छ । रुसी विदेश मन्त्रालयकी प्रवक्ता मारिया जाखारोभाले हुकको भनाइ आफ्नो मुलुकलाई अस्वीकार्य हुने बताइन् ।

‘म पुनः भन्न चाहन्छु- हामीलाई त्यस खालको अभिव्यक्ति अस्वीकार्य छ । अधिकार र नियमविरुद्ध विश्वका कुनै पनि मुलुकले त्यस खालका अभिव्यक्ति दिन मिल्दैन’, रुसी समाचार माध्यमले स्पुटनिकले जाखारोभालाई उदृत गर्दै भनेको छ ।

बिहीबार अमेरिकी विदेश मन्त्रालयका वरिष्ठ अधिकारी तथा इरानका लागि अमेरिकी विशेष प्रतिनिधि ब्रायन हुकले कुद्स फोर्सका नयाँ कमाण्डर इस्माइल गानीलाई हत्या गर्ने चेतावनी दिएका थिए ।

हुकले अशर्क अल अवत पत्रिकासँग डाभोसमा कुराकानी गर्दै गानीले अमेरिकी नागरिकको ज्यान लिएमा उनको हालत पनि सुलेमानीको जस्तै हुने बताएका थिए ।

‘यदि गानीले पनि अमेरिकीलाई मार्ने नीति अबलम्बन गरे भने उनको हालत पनि उस्तै हुनेछ’, हुकले भने । ‘अमेरिकी नागरिक वा अमेरिकी स्वार्थमाथि हुने हमलाको कडा जवाफ दिइनेछ’, राष्ट्रपति टम्पको नीतितर्फ संकेत गर्दै उनले थपे, ‘यो कुनै नयाँ धम्की होइन । अमेरिकी स्वार्थ रक्षा गर्नका लागि निर्णायक कमद चालिने भनेर राष्ट्रपतिले प्रस्ट रुपमा भनिसकेका छन् ।’

अमेरिकाले आफ्ना नागरिक र राष्ट्रिय स्वार्थमा खतरा उत्पन्न गराएको भन्दै यही जनवरी ३ मा ड्रोन हमला गरी इरानका वरिष्ट जनरल तथा कुद्स फोर्सका तत्कालीन प्रमुख कासिम सुलेमानीको हत्या गरेको थियो ।

प्रकाशित मिति: शुक्रबार, माघ १०, २०७६ २०:००

प्रतिक्रिया दिनुहोस्