खड्कालाई नेटवा समुदायको सम्मान

समाचार

गृहपृष्ठ
समाचार
खड्कालाई नेटवा समुदायको सम्मान

खड्कालाई नेटवा समुदायको सम्मान

आइतबार, चैत १८, २०८० बागेश्वरी पोस्ट

नेपालगञ्ज । राउटे, लोपोन्मुख, सीमान्तकृत वर्ग उत्थान प्रतिष्ठानकी अध्यक्ष सत्यदेवी खडकालाई नेटुवा समुदायले सम्मान गरेको छ । लोपोन्मुख नेटवा जातिको पक्षमा निरन्तर वकालत गरेकी अध्यता एवं लेखिका खड्कालाई शनिबार लुम्विनी सांस्कृतिक नगरपालिका वडा नम्बर ३ पडरियामा सम्मान गरिएको हो । खड्का एक दशक अघिदेखि नेटवा समुदायको उत्थान र अधिकारका लागि संघर्षरत थिइन् । खड्काकै अग्रसरतामा नेपाल सरकारले नेटवा समुदायलाई लोपोन्मुख जातिको सूचीमा समावेश गरेपछि समुदायका तर्फबाट सम्मान गरिएको हो । नेटवा समुदायको पक्षमा निरन्तर लडेकी खड्कालाई भव्य समारोहबीच नेटवा जाति उत्थान संघले सम्मान पत्रसहित सम्मान गरेको हो ।

लुम्बिनी सांस्कृतिक नगरपालिकाका उपप्रमुख कल्पना हरिजनले सरकार स्वयंले गर्नुपर्ने काम र दायित्व खड्काले गरिदिएको भन्दै धन्यवादसहित उच्च सम्मान प्रकट गरे । खड्काको लडाइँले आफूहरुलाई पनि घच्घच्याएको भन्दै नेटवा समुदायको बसोबासलाई व्यवस्थित गर्दै जिविकोपार्जनको भरपर्दो माध्यम खोज्ने विश्वास व्यक्त गरे । सम्मानित खड्काले नेटवा समुदायको सम्मानले आफूलाई लोपोन्मुख समुदायका पक्षमा लाग्न थप प्रेरित गरेको उल्लेख गरे । नेटवा जाति उत्थान संघका अध्यक्ष अनिल नेटवाको अध्यक्षतामा भएको कार्यक्रममा नेटवा जाति उत्थान लुम्विनी सांस्कृतिक नगरपालिकाका अध्यक्ष रामलखन नेटवा लगायतले बोलेका थिए । मगन्ता जातिका रुपमा समेत परिचित नेटवा विबाह, पार्टी लगायतमा ब्याण्ड बजाउने लगायतका काम गर्ने गर्दछन् । लोपोन्मुख नेटवा रुपन्देही, कपिलवस्तुमा गरी १४ सय जति रहेका छन् ।

प्रकाशित मिति: आइतबार, चैत १८, २०८० १३:२५