मेयर कप छात्र फुटबलः मोडर्न पब्लिक र युनाइटेड एजुकेशनल एकेडेमी सेमिफाइनलमा

खेलकुद

गृहपृष्ठ
खेलकुद
मेयर कप छात्र फुटबलः मोडर्न पब्लिक र युनाइटेड एजुकेशनल एकेडेमी सेमिफाइनलमा

मेयर कप छात्र फुटबलः मोडर्न पब्लिक र युनाइटेड एजुकेशनल एकेडेमी सेमिफाइनलमा

बुधबार, माघ ३०, २०८१ बागेश्वरी पोस्ट

नेपालगञ्ज । मोडर्न पब्लिक स्कुल र युनाइटेड एजुकेशनल एकेडेमी मेयर कप अन्तर विद्यालय छात्र फुटबल प्रतियोगिताको सेमिफाइनलमा प्रवेश गरेका छन् । भोलि प्रतियोगिताको पहिलो सेमिफाइनल खेलमा होप इन्टरनेशनल स्कुल र मोडर्न पब्लिक स्कुलबीच प्रतिष्पर्धा हुनेछ । दोस्रो सेमिफाइनल खेलमा ग्रीनपिस मावि कोहलपुर र युनाइटेड एजुकेशनल एकेडेमीले प्रतिष्पर्धा गनेछन् ।

नेपालगञ्ज रंगशालामा आज भएको पहिलो क्वाटरफाइनलमा मोडर्न पब्लिक स्कुलले मनकामना स्कुल नेपालगञ्जलाई ५–० ले पराजित गरेको छ । मोडर्न पब्लिक स्कुलको तर्फबाट प्लेयर अफ द म्याच कविर विष्ट र सुशान्त थापाले समान २ गोल गरेका थिए भने प्रकाश बुढाथोकीले १ गोल गरे । प्लेयर अफ द म्याच विष्टलाई एचसीआरसी हस्पिटल नेपालगञ्जका निर्देशक रमेश सिटौला र मध्यपश्चिम क्षेत्रीय खेलकुद विकास समिति नेपालगञ्जका कार्यालय प्रमुख महेश चन्दले पुरस्कृत गरे ।

यसैगरी छात्रतर्फको अर्को खेलमा युनाइटेड एजुकेशनल स्कुल नेपालगञ्जले धम्बोझी मावि नेपालगञ्जलाई पेनाल्टी सुटआउटमा ४–३ ले हराउँदै प्रतियोगिताको सेमिफाइनलमा प्रवेश गरेको छ । निर्धारित समयमा खेल गोलरहित बराबरीमा सकिएको थियो । पेनाल्टी सुटआउटमा युनाइटेडको तर्फबाट प्रदिप बुढा क्षेत्री, अभिशेष रेग्मी, तिलक ऐरी र निक्सन सुनारले गोल गरे । धम्बोझीका समिर मगर, तुफान शाही र राज सोनमले गोल गरेका थिए । खेलमा प्लेयर अफ द म्याच घोषित युनाइटेडका सुशान्त थापा क्षेत्रीलाई वडा प्रहरी कार्यालय बाँकेका प्रमुख प्रहरी निरीक्षक अरुण बम र मदिरा व्यवसायी संघ बाँकेका अध्यक्ष मीम बहादुर सिंह ठकुरीले ट्रफी प्रदान गरेका थिए ।

यसैगरी छात्रातर्फको खेलमा नेपालगञ्ज सेन्ट जेभियर्स स्कुल र युनाइटेडले जित हासिल गर्दै प्रतियोगिताको सेमिफाइनलमा प्रवेश गरेका छन् । सेन्ट जेभियर्सले धम्बोझी माविलाई ३–० ले पराजित गरेको छ । सेन्ट जेभियर्सको तर्फबाट सुवानी थापाले २ गोल र रमिता कुमारी बडुवालले १ गोल गरे । सुवानीले ३३औं र ३९औं मिनेटमा गोल गरे भने रमिता कुमारीले ९औं मिनेटमा गोल गरेकी थिइन् । खेलमा नेपालगञ्ज सेन्ट जेभियर्सकी खेलाडी सुवानी प्लेयर अफ द म्याचबाट पुरस्कृत भइन् । उनलाई महिला फुटबल समिति बाँके अध्यक्ष नितु शाह चन्द र ब्लुम सेनेटरी प्याडको नेपालगञ्जका लागि आधिकारिक विक्रेता सूर्य सप्लायर्सका प्रोप्राइटर सुमिन श्रेष्ठले पुरस्कृत गरेका थिए ।

छात्रातर्फको अर्को खेलमा युनाइटेडले मनकामना स्कुललाई ७–० ले पराजित गर्दै सेमिफाइनलमा प्रवेश गरेको छ । युनाइटेडको जितमा प्रकृति सुनारले ४ गोल, सुस्मिता रोकाले २ गोल र निरु गुरुङले १ गोल गरे । खेलमा सर्वाधिक गोल गर्ने प्रकृति प्लेयर अफ द म्याचबाट पुरस्कृत भइन् । उनलाई नेपाली कांग्रेस बाँकेका सह–सचिव बिनोद थारु र शुभकामना मेडिकल हलका सञ्चालक एवम् बाँके जिल्ला फुटबल संघका सदस्य दिपेन्द्र घलेले ट्रफी प्रदान गरे ।

प्रतियोगिता अन्तर्गत बिहिबार छात्रातर्फ पहिलो सेमिफाइनल खेलमा डिफेन्डिङ च्याम्पियन नेपालगञ्ज मोडेल एकेडेमी र नेपालगञ्ज सेन्ट जेभियर्स स्कुलबीच प्रतिष्पर्धा हुनेछ । दोस्रो सेमिफाइनल खेलमा युनाइटेड र आदर्श मावि नेपालगञ्जबीच प्रतिष्पर्धा हुनेछ । बाँके जिल्ला फुटबल संघको आयोजनामा सुरु भएको प्रतियोगिताको छात्रतर्फ २१ टिम र छात्रातर्फ ६ टिमको सहभागिता रहेको छ । प्रतियोगिताको फाइनल खेल फागुन ३ गते हुनेछ ।

प्रकाशित मिति: बुधबार, माघ ३०, २०८१ २१:१७

प्रतिक्रिया दिनुहोस्