पत्रकार ओलीलाई ‘नयनराज रावल स्मृति पुरस्कार तथा सम्मान’

स्थानीय

गृहपृष्ठ
स्थानीय
पत्रकार ओलीलाई ‘नयनराज रावल स्मृति पुरस्कार तथा सम्मान’

पत्रकार ओलीलाई ‘नयनराज रावल स्मृति पुरस्कार तथा सम्मान’

बिहीबार, साउन २९, २०८२ बागेश्वरी पोस्ट

नेपालगञ्ज । पत्रकार रामबहादुर ओली (रामु) लाई ‘नयनराज रावल स्मृति पुरस्कार तथा सम्मान’ प्रदान गरिएको छ । सामाजिक अभियन्ता स्वर्गीय रावलको स्मृतिमा स्थापित उक्त पुरस्कार नेपालगञ्जमा क्रियाशील पत्रकार ओलीलाई प्रदान गरिएको हो । दमयन्ती फाउण्डेशनले आज रावलको नवौं स्मृति दिवसको अवसरमा उक्त पुरस्कार प्रदान गरेको हो ।

दमयन्ती फाउण्डेशन नेपालका अध्यक्ष तथा स्वर्गीय रावलकी धर्मपत्नी इन्दिरा कुमारी जिसी रावलको अध्यक्षतामा सम्पन्न कार्यक्रममा प्रमुख अतिथि नेपालगञ्ज उपमहानगरपालिकाका नगर प्रमुख प्रशान्त बिष्ट, विशिष्ट अतिथि प्रमुख जिल्ला अधिकारी धर्मराज जोशी तथा अतिथिहरु बाँके जिल्ला प्रहरी प्रमुख राम प्रसाद घर्ती मगर, नेपाल पत्रकार महासंघ बाँकेका अध्यक्ष नवीन गिरी, भेरी अस्पतालका बरिष्ठ फिजिसियन डा. संकेत रिसालसहित बिभिन्न संघसंस्थाका अगुवाको उपस्थितिमा ओलीलाई दश हजार एक रुपैयाँ राशीको उक्त पुरस्कार प्रदान गरिएको हो ।

कार्यक्रमका बक्ताहरुले स्वर्गीय रावलले आफ्नो जीवन कालमा समाजलाई पुर्‍याएको योगदानको उच्च कदर गर्दै लागुऔसषध दुर्व्यसन विरुद्ध सबै मिलेर लाग्नुपर्नेमा जोड दिए । नगर प्रमुख बिष्टले लागुऔषध बिरुद्धका अभियन्ताको रुपमा स्वर्गीय रावलले पुर्‍याएको योगदानको स्मरण गर्दै समाज लागुऔषधको दलदलमा फस्दै गएकोले सबै मिलेर यस विरुद्ध लाग्नुपर्ने बताए । त्यस अवसरमा प्रमुख जिल्ला अधिकारी जोशी, प्रहरी प्रमुख घर्ती मगर, नेपाल पत्रकार महासंघ बाँकेका अध्यक्ष गिरी, बरिष्ठ चिकित्सक डा. रिसाल लगायतले सामाजिक अभियन्ताको रुपमा रावलले गरेको कार्यको स्मरण गर्दै उनको अभियानलाई परिवारले निरन्तरता दिएकोमा खुसी ब्यक्त गरेका थिए ।

लागुऔषध दुर्व्यसन विरुद्ध र पुनःस्थापना क्षेत्रमा लामो समयदेखि काम गर्दै आएका रावलको २०७३ साल साउन २९ गते करेन्ट लागेर निधन भएको थियो । फाउण्डेशनले हरेक बर्ष स्मृति दिवसमा लागुऔषध विरुद्ध काम गर्ने ब्यक्तिलाई यो पुरस्कार प्रदान गर्दै आएको छ ।

प्रकाशित मिति: बिहीबार, साउन २९, २०८२ २०:१३

प्रतिक्रिया दिनुहोस्