लैङ्गिक हिंसाका कारण महिला तथा किशोरीमा मानसिक समस्या

स्थानीय

गृहपृष्ठ
स्थानीय
लैङ्गिक हिंसाका कारण महिला तथा किशोरीमा मानसिक समस्या

लैङ्गिक हिंसाका कारण महिला तथा किशोरीमा मानसिक समस्या

बुधबार, असोज ८, २०८२ बागेश्वरी पोस्ट

नेपालगञ्ज । लैङ्गिक हिंसाका कारण मधेशी समुदायका महिला तथा किशोरीहरुमा मानसिक समस्या देखिएको छ । समुदायका पुरुष अभिभावकमा सचेतनाको अभावका कारण महिला तथा किशोरीहरुलाई विभिन्न हिंसामा पारिएको पीडितहरुले बताएका छन् ।

महिला र कानुन विकास मञ्चको सहकार्यमा सूचना र मानव अधिकार अनुसन्धान केन्द्रले महिला तथा बालिका हिंसाविरुद्ध निर्माण गर्न लागेको नीतिको बारेमा गरेको अभिमुखीकरण कार्यक्रममा सहभागी सरोकारवालाले महिलाहरु अझै पीडित रहेको बताएका थिए ।

जानकी गाउँपालिकाले मनोसामाजिक सेवामार्फत महिला तथा किशोरीहरुको अवस्था पहिचान गर्ने क्रममा त्यस्तो समस्या देखिएको जनाएको छ । पालिकाका मनोसामाजिक परामर्शकर्ता राधा आचार्यले विभिन्न वडाका महिला तथा किशोरीहरुलाई भेटेर कुरा गर्दा उनीहरु स्वतन्त्ररुपमा जीवनयापन गर्न नपाएपछि मानसिक समस्यामा परेको बताइन् ।

उनले भनिन्,–‘महिलाहरु आफ्नै परिवारवाट घरेलु हिंसामा परेका छन्, किशोरीहरुले प्रायः उच्च शिक्षा पढ्न पाएका छैनन्, केटाकेटीमा विभेद गरिएको छ । बाल विवाह, दाइजो प्रथा लगायतका कारणले समुदायका अभिभावकले टर्चर गर्नाले उनीहरुमा मानसिक समस्या देखिएको उनले बताइन् ।

परम्परागत सोच र सचेतनाको अभावमा अझै पनि महिलाहरु दबेर बस्नुपरेको अवस्था रहेको उनको भनाई छ । कार्यक्रममा प्रमुख प्रशासकीय अधिकृत प्रशुराम उपाध्यायले पालिकाले महिला र बालिका हिंसाविरुद्ध कानुन निर्माण गरी उनीहरुको समस्यालाई समाधान गर्नमा मद्दत पुग्ने भन्दै समुदायका अभिभावकहरुलाई सचेत बनाउनुपर्नेमा जोड दिए ।

कार्यक्रममा वडा अध्यक्षहरु मो. रजा राई, चन्द्रिकाप्रसाद गुप्ता, राजकुमार कुर्मी, जगदिशप्रसाद हरिजन, कार्यपालिका सदस्य रामअचल धोबी, कान्ति काँदु, निर्मला हरिजन, महिला तथा बालबालिका शाखा प्रमुख कल्पना गाहा लगायतले पालिकामा मधेशी समुदायको बाहुल्यता बढी भएकाले अशिक्षाका कारण महिला र किशोरीमाथिको हिंसा बढेकाले उनीहरुलाई जागरुक बनाउनुपर्नेमा जोड दिए ।

कार्यक्रममा आयोजक संस्थाका अध्यक्ष अधिबक्ता विश्वजीत तिवारीले महिला र किशोरीसंग सम्वन्धित कानुन तथा प्रक्रिया लगायतका बारेमा जानकारी गराएका थिए । संस्थाका उपाध्यक्ष कृष्णमुरारी प्रसाद भट्टको सभापतित्वमा सम्पन्न कार्यक्रमको सञ्चालन कार्यकारी निर्देशक राकेशकुमार मिश्रले गरेका थिए ।

महिला तथा बालिका हिंसाविरुद्ध नीतिगत सुधार तथा सचेतना कार्यक्रम अन्तर्गत संस्थाले बाँके र बर्दियाका चार वटा स्थानीय तहमा महिला तथा बालिका हिंसाविरुद्ध ऐन, कानुन, नीति तथा कार्यविधि निर्माण गर्न लागेको हो ।

प्रकाशित मिति: बुधबार, असोज ८, २०८२ २१:०२

प्रतिक्रिया दिनुहोस्