नेपालगञ्ज उपमहानगरपालिकाको सार्वजनिक सुनुवाईमा ७ बुँदे प्रतिबद्धता

स्थानीय

गृहपृष्ठ
स्थानीय
नेपालगञ्ज उपमहानगरपालिकाको सार्वजनिक सुनुवाईमा ७ बुँदे प्रतिबद्धता

नेपालगञ्ज उपमहानगरपालिकाको सार्वजनिक सुनुवाईमा ७ बुँदे प्रतिबद्धता

शुक्रबार, मंसिर ५, २०८२ बागेश्वरी पोस्ट

नेपालगञ्ज । सात बुँदे साझा सार्वजनिक प्रतिबद्धताको घोषणा गर्दै नेपालगञ्ज उपमहानगरपालिकाको आर्थिक बर्ष २०८२/०८३ को पहिलो चौमासिक सार्वजनिक सुनुवाई सम्पन्न भएको छ । बास नेपालको सहजीकरणमा आज सम्पन्न सुनुवाईमा गरिएका प्रतिबद्धताहरुमा नेपालगञ्ज उपमहानगरपालिकाले बनाउने योजना कार्यक्रमलाई लैससासमैत्री बनाउने तथा निर्माण गरिने भौतिक संरचनालाई अपांगतामैत्री बनाउने नीतिको पूर्ण कार्यान्वयन गर्ने, उपमहानगरपालिकाको मुख्य बजार क्षेत्रमा सडक अतिक्रमण भइरहेकाले अतिक्रमण र फुटपाथ ब्यवस्थापनका लागि विशेष अभियान सञ्चालन गर्ने, उपमहानगरपालिका क्षेत्रभित्र छाडा पशु चौपाया ब्यवस्थापनका लागि आम नगरबासी, नगर प्रहरी, स्थानीय प्रतिनिधि र सरोकारवाला सबै मिलेर समस्या समाधान गर्ने गरी विशेष योजना बनाउने, नगरभित्रका विभिन्न सडकमा सडक बत्ती नभएको भन्ने गुनासो आएकाले सो समस्या समाधान गर्न स्थलगत अनुगमन गरी तत्काल जडान गर्ने, उपमहानगरपालिकाको विभिन्न स्थानमा नाला सरसफाई र ढल निकासका लागि अनुगमन गरी आवश्यक कार्य गर्ने, वडा नम्बर २१ र २२ मा पर्ने कान्तितालको संरक्षण र ब्यवस्थापनका लागि चालू आर्थिक बर्षभित्र बत्ती जडान र अन्य आवश्यक कार्य गर्ने, लक्षित बर्ग उत्थान कार्यक्रम अन्तरगत लक्षित बर्गले आवश्यकता पहिचान गरी माग गरी आएमा आवश्यक सम्बोधन गर्ने रहेका छन् ।

सुनुवाईको शुरुवातमा नेपालगञ्ज उपमहानगरपालिकाका प्रमुख प्रशासकीय अधिकृत रामहरि शर्माले पहिलो चौमासिकमा भएका क्रियाकलाप तथा महत्वपूर्ण उपलब्धिको बारेमा जानकारी गराएका थिए । सुनुवाईमा उठेका प्रश्न तथा जिज्ञासाको समाधान नगर प्रमुख प्रशान्त बिष्ट, प्रमुख प्रशासकीय अधिकृत, वडा अध्यक्ष, र शाखा प्रमुखहरुले दिएका थिए । बास नेपालका कार्यक्रम अधिकृत रबिन्द्र बोहराले सहजीकरण गरेको सुनुवाईमा स्वागत तथा कार्यक्रमको उद्देश्यमाथि बास नेपालका केन्द्रीय अध्यक्ष शिव कुमार वर्माले प्रकाश पारेका थिए भने नागरिक प्रतिबेदन पत्र र बहिर्गमन अभिमतको नतिजा घोषणा बास नेपालका जनसम्पर्क अधिकृत माधब कार्कीले गरेका थिए । उपमहानगरपालिकाको पहिलो चौमासिक सार्वजनिक सुनुवाई नेपालगञ्ज उपमहानगरपालिका वडा नम्बर २२ कान्तिताल नजिक बाबाकुटी परिसरमा सम्पन्न भएको थियो ।

प्रकाशित मिति: शुक्रबार, मंसिर ५, २०८२ १८:५३

प्रतिक्रिया दिनुहोस्