लैङ्गिक हिंसाविरुद्ध १६ दिने अभियानमा १६ कार्यक्रम

स्थानीय

गृहपृष्ठ
स्थानीय
लैङ्गिक हिंसाविरुद्ध १६ दिने अभियानमा १६ कार्यक्रम

लैङ्गिक हिंसाविरुद्ध १६ दिने अभियानमा १६ कार्यक्रम

बिहीबार, मंसिर ११, २०८२ बागेश्वरी पोस्ट

नेपालगञ्ज । महिला हिंसा विरुद्धको १६ दिने अभियान अन्तर्गत बाँकेमा १६ दिन १६ वटा कार्यक्रम गरी मनाइँदैछ । २५ डिसेम्बरका दिनदेखि शुरु भएको अभियान अन्तर्गत सूचना र मानव अधिकार अनुसन्धान केन्द्र र नारी विकास केन्द्र नेपालगञ्जको संयुक्त पहलमा अभियान शुरु गरिएको हो । १६ दिने अभियान अन्तर्गत निःशुल्क कानुनी परामर्श शुरु भएको छ । समुदायमा रहेका महिला, गरिब, विपन्न, असहाय, मुस्लिम महिलाहरुलाई कानुनसंग सम्वन्धित विभिन्न सेवाहरु प्रदान गरिने संस्थाका अध्यक्ष अधिबक्ता विश्वजित तिवारीले बताए । उनका अनुसार पीडित तथा गरिब असहाय महिलाहरुलाई कानूनमा पहुँच पुर्याउनका लागि निःशुल्क कानूनी परामर्श सेवा शुरु गरिएको हो ।

यो संगै दिप प्रज्वलन, प्ले कार्ड प्रदर्शन, सचेतनामूलक रिवन वितरण, बागेश्वरी मन्दिरमा महिलाहरुको जुत्ता चप्पल सरसफाई गर्ने, लैङ्गिक हिंसा पीडितहरुसगं छलफल, रेडियो संवाद, सामाजिक सञ्जालमा सचेतना अभिबृद्धि, सचेतनामूलक सन्देशसहितको व्यानर प्रदर्शन, महिला सम्वन्धि कानुनको बारेमा जानकारी, विद्यार्थीहरुलाई साइबरबारे अभिमुखीकरण गर्ने लगायत १६ वटा कार्यक्रम गरिने नारी विकास केन्द्रका कोषाध्यक्ष रचना श्रेष्ठले बताइन् । उनले यो १६ दिने अभियान मात्र नभई महिलाहरुको हक अधिकार तथा लैङ्गिक हिंसा निवारणका लागि ३६५ दिन निरन्तर लाग्नुपर्नेमा जोड दिइन् ।

१६ दिने अभियान विशेष गरी महिलाको कानूनी अधिकारसंग जोडिएकाले उनीहरुको सवालमा पैरवी र सामाजिक सेवाको भावनाले उक्त सेवा प्रदान गर्न शुरु गरिएको संस्थाका अध्यक्ष अधिबक्ता तिवारीले बताए । संस्थाले विगत लामो समयदेखि समुदायका गरिब, विपन्न तथा अल्पसंख्यक समुदायका नागरिकहरुको कानूनी प्रक्रिया अन्तर्गत निवेदन, जाहेरी, प्रतिउत्तर मुद्दा लगायतको सेवा प्रदान गर्दै आएको कार्यकारी निर्देशक राकेश कुमार मिश्रले बताए । संस्थाले कानूनको क्षेत्रमा विशेष काम गरिरहेकाले कानूनसंग सम्वन्धित विभिन्न सेवाहरु उपलब्ध गराउँदै आएको छ । संस्था कानूनी परामर्शसंगै अन्य सरोकारवाला निकायसंगको समन्वयमा सचेतनामूलक अभियानमा पनि जोडिएको मिश्रले बताए ।

प्रकाशित मिति: बिहीबार, मंसिर ११, २०८२ २०:१९

प्रतिक्रिया दिनुहोस्