'लैङ्गिक हिंसाविरुद्ध कानुनको कार्यान्वयन नहुँदा पीडितले न्याय पाएनन्'

स्थानीय

गृहपृष्ठ
स्थानीय
'लैङ्गिक हिंसाविरुद्ध कानुनको कार्यान्वयन नहुँदा पीडितले न्याय पाएनन्'

'लैङ्गिक हिंसाविरुद्ध कानुनको कार्यान्वयन नहुँदा पीडितले न्याय पाएनन्'

बिहीबार, मंसिर १८, २०८२ बागेश्वरी पोस्ट

नेपालगञ्ज । लैङ्गिक हिंसाविरुद्ध अहिले थुप्रै कानुनहरु भए पनि त्यसको प्रभावकारी कार्यान्वयनको अभाव भएको कानुन विज्ञहरुले बताएका छन् । उनीहरुले महिला तथा बालबालिका सम्वन्धि कानुन पर्याप्त भए पनि कार्यान्वयन प्रक्रिया फितलो भएकाले पीडितले न्यायोचित न्याय पाउन नसकेको अवस्था रहेको बताएका थिए ।

महिला कानुन र विकास मञ्चको सहकार्यमा सूचना र मानव अधिकार अनुसन्धान केन्द्रले कानुन निर्माणका विषयमा आज नेपालगञ्जमा गरेको कानुन विज्ञसंगको संवादमा सहभागी कानुन व्यवसायीहरुले अपराध गर्ने मानिस खुलेआम सम्मानपूर्वक हिँडिरहेकाले पीडितलाई न्यायको अनुभूति नभएको बताएका छन् । उनीहरुले लैङ्गिक हिंसा जस्तो जघन्य अपराध नियन्त्रणका लागि आफ्नै घरपरिवारबाट अभियान संचालन गरी समाजमा सचेतना र सरोकारवाला निकायलाई कानुनको कार्यान्वयनका लागि दबाब दिनुपर्ने जोड दिएका थिए ।

कार्यक्रममा वरिष्ठ अधिबक्ता सुनिलकुमार श्रेष्ठले लैङ्गिक हिंसा निवारणका लागि मानिसको व्यवहार, आचरण परिवर्तन गर्नुपर्ने भन्दै महिला पुरुषले समानरुपमा घरको भान्सादेखि बाहिरसम्म सबै काममा सहयोग गर्नुपर्ने बताए । उच्च अदालत बार एशोशिएसन नेपालगञ्जका अध्यक्ष अधिबक्ता चित्रबहादुर शाहीले हरेक अभिभावकले महिला पुरुषमा कुनै पनि विभेद नगरी समानरुपमा उच्च शिक्षा दिनुपर्ने भन्दै अपराध गर्ने जोकोहीलाई कानुनको दायरामा ल्याउनुपर्नेमा जोड दिए । अधिबक्ता बसन्त गौतमले लैङ्गिक हिंसाका सवाललाई सम्बोधन गर्न हरेक कार्यालयमा हेल्प डेस्कको व्यवस्थापन गर्नुपर्ने भन्दै महिला सशक्तिकरण र आर्थिकस्तर बृद्धिका कार्यक्रम संचालन गर्नुपर्नेमा जोड दिए ।

महिला अगुवा शाहिदा शाहले समाजमा राम्रो काम गर्ने महिलाको सम्मान गर्नुले अन्य महिलालाई समेत उत्प्रेरणा मिल्ने भएकाले महिलामाथि दुराचार गर्नेलाई सशक्तरुपमा कानुनी कारवाही गर्नुपर्नेमा जोड दिइन् । डुडुवा गाउँपालिकाका रोजगार संयोजक अल्का मिश्रले महिला तथा बालबालिकासम्वन्धि विभिन्न कानुनहरु भए पनि त्यसबारे प्रचारप्रसारको अभावमा महिलाहरुमा सचेतना न्यून रहेकाले पीडितले कानूनी उपचारबारे प्रक्रिया थाहा नपाउँदा अघि बढ्न नसकेको बताइन् । कार्यक्रममा संस्थाका अध्यक्ष अधिबक्ता विश्वजित तिवारी, महासचिव अधिबक्ता केवलसिंह थारु, उच्च अदालत बार एशोसिएशन नेपालगञ्जका पूर्व अध्यक्ष बलबहादुर चन्द, अधिबक्ता हिरा श्रेष्ठ, अधिकारकर्मी टेकनाथ आचार्य लगायतले लैङ्गिक हिंसाका विभिन्न सवालका बारेमा आ–आफ्नो धारणा व्यक्त गरेका थिए ।

प्रकाशित मिति: बिहीबार, मंसिर १८, २०८२ २०:०६

प्रतिक्रिया दिनुहोस्