चिसो अत्यधिक बढेपछि दाउरा र कम्बल बाँड्दै बाँकेका स्थानीय सरकार

स्थानीय

गृहपृष्ठ
स्थानीय
चिसो अत्यधिक बढेपछि दाउरा र कम्बल बाँड्दै बाँकेका स्थानीय सरकार

चिसो अत्यधिक बढेपछि दाउरा र कम्बल बाँड्दै बाँकेका स्थानीय सरकार

नेपाली सेनाले पनि दाउरा बाँड्यो

मंगलबार, पुस १५, २०८२ बागेश्वरी पोस्ट

नेपालगञ्ज । बाक्लो हुस्सु, कुहिरो र शीतलहरका कारण अत्यधिक चिसो बढेपछि बाँकेको जनजीवन प्रभावित भएको छ । बाँकेका स्थानीय तहले धमाधम दाउरा वितरण गर्न थालेका छन् । जिल्ला आपतकालीन कार्यसंचालन केन्द्रका फोकल पर्सन रुपन ज्ञवालीका अनुसार जिल्लाका आठ वटै पालिकाले दाउरा वितरण गरिरहेका छन् ।

पुस लागेदेखि बाँकेमा एकाध दिन बाहेक घामै लागेको छैन । स्थानीय तहले गरीब तथा विपन्नलाई कम्बल वितरण समेत गरिरहेका छन् । हालसम्म विभिन्न पालिकामा १०८० थान कम्बल वितरण भइसकेको ज्ञवालीले जानकारी दिनुभयो । जानकी गाउँपालिकामा ८००, राप्तीसोनारी गाउँपालिकामा १८०, कोहलपुर खजुरामा ५०/५० थान कम्बल वितरण गरिएको छ । बैजनाथले पनि कम्बल वितरण सुरु गरेको जनाएको छ । १७८० थान कम्बल मौज्दात छ ।

यस्तै सार्वजनिक स्थानमा आगो बाल्नका लागि ६४ चट्टा दाउरा मौज्दात रहेकोमा नरैनापुरले १० चट्टा तथा बैजनाथ, र राप्तीसोनारीले २/२ चट्टा दाउरा वितरण गरिसकेका छन् भने अन्य पालिकामा पनि वितरण हुँदैछ । नेपालगन्ज उपमहानगरपालिकाले पनि आजदेखि दाउरा वितरण गर्न सुरु गरेको छ । सार्वजनिक स्थान, चोक, मानिसको भिडभाड हुने ठाउँहरुमा आगो ताप्नका लागि दाउरा वितरण सुरु गरेको नगर प्रमुख प्रशान्त विष्टले बताए ।

अत्यधिक चिसो बढेपछि नेपालगञ्ज उपमहानगरपलिकाले सार्वजनिक स्थानमा आगो ताप्नको लागि दाउरा उपलब्ध गराएको प्रमुख प्रशासकीय अधिकृत रामहरी शर्माले जानकारी दिए । बाँकेका प्रमुख जिल्ला अधिकारी दिल कुमार तमाङले बाँकेमा अत्यधिक चिसो बढेका कारण शीतलहर पूर्व कार्य अन्तर्गत स्थनीय तहहरुले दाउरा वितरण गर्ने, चिसोबाट जोगिन विभिन्न सचेतनाको काम गर्न सुरु गरेको बताए ।

May be an image of one or more people

यसैबीच नेपाली सेनाको बज्रदल गण राँझाले चिसो पीडितहरुलाई जिल्लाका खजुरा, पुरैना, फुलटेक्रा, आलानगर लगायत विभिन्न स्थानहरुमा आगो ताप्न दाउरा सहयोग गरेको गणका गणपति प्रमुख सेनानी रामचन्द्र श्रेष्ठले जानकारी दिए ।

May be an image of one or more people

यसैगरी यहाँका सबै पालिकाले विद्यालयहरुमा जाडो विदा दिएका छन् । बाँकेमा जिल्ला विपद् ब्यवस्थापन समितिले चिसो तथा शीतलहर पूर्व तयारी तथा प्रतिकार्य योजना अद्यावधिक गरी सोही अनुसार काम गरिरहेको जनाएको छ । उक्त योजना अनुसार यस बर्ष बाँकेमा ३६ हजार घरपरिवारका १ लाख ७६ हजार मानिस चिसो तथा शीतलहरबाट प्रभावित हुने प्रक्षेपण गरिएको छ ।

May be an image of one or more people, fire and text