कुरिल द्वीपमा शक्तिशाली भूकम्प

विश्व

गृहपृष्ठ
विश्व
कुरिल द्वीपमा शक्तिशाली भूकम्प

कुरिल द्वीपमा शक्तिशाली भूकम्प

बुधबार, चैत १२, २०७६ एजेन्सी

एजेन्सी । रसियाको कुरिल द्वीपमा बुधबार बिहान २ बजेर ४९ मिनेट जादाँ ७.५ म्याग्नीच्यूडको शक्तिशाली भूकम्प गएको अमेरिकी भूगर्भ सर्भेले जनाएको छ ।

अमेरिकी भूवैज्ञानिक सर्वेक्षणका अनुसार ५९ किलोमिटर (३७ माइल)को गहिराईको उक्त भूकम्प उत्तर-पूर्वी जापानी शहर सप्पोरोबाट १,४०० किलोमिटरको दूरी आसपासलाई केन्द्र बनाएर गएको हो ।

भूकम्पपछिको क्षतिबारे कुनै विवरण प्राप्त भइसकेको छैन । द गार्जिएनका अनुसार भूकम्पको इपिसेन्टरको १००० किलोमिटर आसपास सुनामीको चेतावनी दिइएको छ । यसअघि पनि यति शक्तिशाली भूकम्पपछि शक्तिशाली सुनामी आउने गरेको अमेरिकन राष्ट्रिय सुनामी चेतावनी केन्द्रले विश्लेषण गरेको छ ।

केन्द्रले भनेको छ, ‘यो भूकम्पसँग विनाशकारी सुनामी उत्पन्न गर्ने क्षमता छ ।’ केन्द्रका अनुसार हवाई, जापान, रुस र प्रशान्त द्विपको टापु मिडवेमा सावधानी अपनाउनु उपयुक्त हुन्छ । उसले सुनामीको ज्वारको स्तर ०.३ मिटरभन्दा कम रहने अनुमान गरेको छ ।

जापानको मौसम विभागका अधिकारीहरुले कुनै चेतावनी सार्वजनिक गरेका छैनन् । उनीहरुले भूकम्पका कारण सामान्य ज्वारभाटा आउन सक्ने सम्भावनालाई भने स्वीकारेका छन् । हवाईमा सामान्य सुनामीको चेतावनी जारी गरिए पनि पछि रद्द गरिएको थियो ।

प्रकाशित मिति: बुधबार, चैत १२, २०७६ १०:१९