नेपालगन्जमा भूमिहीनलाई लालपुर्जा वितरण गर्न जग्गा नापजाँच सुरु

स्थानीय

गृहपृष्ठ
स्थानीय
नेपालगन्जमा भूमिहीनलाई लालपुर्जा वितरण गर्न जग्गा नापजाँच सुरु

नेपालगन्जमा भूमिहीनलाई लालपुर्जा वितरण गर्न जग्गा नापजाँच सुरु

सोमबार, चैत ९, २०८२ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले भूमिहीन दलित, भूमिहीन सुकुम्बासी तथा अव्यवस्थित बसोबासीहरुलाई लालपूर्जा वितरण गर्ने उद्देश्यसहित जग्गा नापजाँच कार्य सुरु गरेको छ । यसअघि जिल्ला भूमि आयोग खारेज गर्ने सरकारको निर्णयका कारण काम अबरुद्ध भएको थियो । तर, सर्वोच्च अदालतले उक्त निर्णय बदर गरिदिएसंगै आयोगले पुनः काम अगाडि बढाएको छ ।

आज वडा नम्बर २१ मा आयोजित कार्यक्रममार्फत नापजाँच कार्यको शुभारम्भ गर्दै नगर प्रमुख प्रशान्त विष्टले आफ्नै नेतृत्वको स्थानीय सरकारले भूमिहीन दलित, भूमिहीन सुकुम्बासी र अव्यवस्थित बसोबासीहरुलाई लालपूर्जा वितरण गर्ने विश्वास दिलाए । “लामो समयदेखि समाधान हुन नसकेको भूमिहीन समस्या अन्त्य गर्न हामी निरन्तर प्रयासरत छौं,” उनले भने “सरकार परिवर्तन भए पनि यो अभियानलाई पूर्णता दिने काममा नेपालगञ्ज उपमहानगरपालिका प्रतिबद्ध छ ।”

नगर प्रमुख विष्टले नेपालगञ्ज उपमहानगरपालिकाले गर्ने निर्णयमा एकछिन पनि ढिला नगर्ने स्पष्ट पारे । उनले नापजाँच कार्यमा खटिएका प्राविधिकहरुलाई स्थानीय स्तरबाट आवश्यक सहजीकरण गर्न समेत अनुरोध गरे । स्थानीय जितेन्द्र पुन र पुनम बुढाथोकीले जग्गा नापजाँच सुरु भएकोमा खुशी व्यक्त गर्दै यसले वर्षौंदेखिको समस्या समाधान हुने आशा व्यक्त गरे । वडा नम्बर २१ का वडा अध्यक्ष राज कुमार साहुले नापजाँचका क्रममा कुनै समस्या आए वडा कार्यालयमा समन्वय गर्न आग्रह गरे ।

कार्यक्रममा प्रमुख प्रशासकीय अधिकृत रामहरि शर्मा, भूमि आयोगका विज्ञ सदस्य ठाकुर भुसाल र सदस्य तलत प्रविन खाँ, नापी शाखाका अधिकृत पवनदेव अर्याल लगायत स्थानीयहरुको उपस्थिति रहेको थियो ।

प्रकाशित मिति: सोमबार, चैत ९, २०८२ १९:२४

प्रतिक्रिया दिनुहोस्