राँझामा फुटपाथ बनाइँदै, मेयरले गरे उद्घाटनः अवैध संरचना हटाउन डोजर चल्यो

स्थानीय

गृहपृष्ठ
स्थानीय
राँझामा फुटपाथ बनाइँदै, मेयरले गरे उद्घाटनः अवैध संरचना हटाउन डोजर चल्यो

राँझामा फुटपाथ बनाइँदै, मेयरले गरे उद्घाटनः अवैध संरचना हटाउन डोजर चल्यो

आइतबार, चैत १५, २०८२ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले फुटपाथ अतिक्रमण गरी बनाइएका संरचनामाथि डोजर चलाएको छ । वडा नम्बर २० राँझामा फुटपाथ क्लियर गर्ने क्रममा त्यसमाथि बनाइएका अवैध संरचना हटाउन डोजर चलाइएको हो । नेपाल आयल निगम चोकदेखि सरोजिनी मेमोरियल पोलिक्लिनिक चोकसम्मको सडकको दुबैतर्फ डोजर चलाइएको नेपालगञ्ज उपमहानगरपालिकाले जनाएको छ ।

फुटपाथ निर्माण कार्यको नगर प्रमुख प्रशान्त विष्टले उद्घाटन गरेका थिए । मुख्य सडकदेखि दुबैतर्फ दुई दुई मिटर चौडाईको फुटपाथ बनाउन लागिएको हो । दुबैतर्फको लम्बाई २६०० मिटर छ । नगर प्रमुख विष्टले देश विदेशका पर्यटकहरु नेपालगञ्ज विमानस्थल भएर ओहोरदोहोर गर्ने महत्वपूर्ण सडक भएकोले यसको सौन्दर्यकरण र व्यवस्थापन थालिएको बताए । उनले विमानस्थलबाट मानिसहरु आउँदा पहिलो दृष्टि नै यसमा पर्ने भएकोले राम्रो सन्देश प्रवाह गर्न आवश्यक रहेको बताए । दोस्रो चरणमा राँझा चोकसम्म पनि विस्तार गर्ने योजना रहेको नगर प्रमुख विष्टले बताए । त्यस अवसरमा प्रमुख प्रशासकीय अधिकृत मान बहादुर बम, वडा नम्बर २० का वडा अध्यक्ष कौशल कुमार धोवी लगायतको उपस्थिति थियो ।

२ करोड १५ लाखमा ठेक्का खोलेकोमा गाउँले कन्स्ट्रक्सनरपञ्चदेवी निर्माण सेवा र ए एण्ड ए कन्स्ट्रक्सन जेभीले २ करोड ७ लाख ९९ हजार २ सय ११ रुपैयाँ ३३ पैसामा ठेक्का सम्झौता गरी फुटपाथ निर्माण थालेको नेपालगञ्ज उपमहानगरपालिकाका इन्जिनियर चन्दन दासले जानकारी दिए । सम्झौता अवधि असार १५ गतेसम्म भए पनि निर्माण कम्पनीले २० देखि २५ दिनभित्र काम सक्ने दाबी गरेको छ ।

प्रकाशित मिति: आइतबार, चैत १५, २०८२ १८:३८

प्रतिक्रिया दिनुहोस्