जीवन उपयोगी सीप तालिम सम्पन्न

स्थानीय

गृहपृष्ठ
स्थानीय
जीवन उपयोगी सीप तालिम सम्पन्न

जीवन उपयोगी सीप तालिम सम्पन्न

मंगलबार, चैत २४, २०८२ बागेश्वरी पोस्ट

नेपालगन्ज । जीवनलाई कसरी ब्यवस्थित र सहज बनाउने भन्ने महत्वपूर्ण ज्ञान र सीप हासिल गरेको खजुरामा आयोजित जीवन उपयोगी सीप तालिमका सहभागीहरुले बताएका छन् । खजुरा गाउँपालिका वडा नम्बर ३ को सहयोग तथा बास नेपालको आयोजनामा आज सम्पन्न दुइ दिने क्षमता अभिबृद्धि तालिमका सहभागीहरुले यस्तो बताएका हुन् ।

तालिमको समापन कार्यक्रममा प्रतिक्रिया मन्तब्य राख्दै सहभागी करुणा सुनारले तालिमबाट जीवन उपयोगी कुराको ज्ञान हासिल गरेको बताइन् । उनले तालिम पश्चात बोली, ब्यवहार, संचार, तनाव ब्यवस्थान लगायतका महत्वपूर्ण बिषयमा सीप हासिल भएको र सिकेको कुरालाई ब्यवहारमा लागू गर्ने प्रतिबद्धता ब्यक्त गरे । यसैगरी तालिमका अर्का सहभागी दिया सुनारले तालिमबाट अपेक्षा गरे भन्दा बढी सीप र ज्ञान हासिल गरेको बताइन् । सिकेको कुरालाई ब्यवहारमा लागू गर्ने उनको प्रतिबद्धता थियो ।

तालिमको समापन कार्यक्रममा बोल्दै खजुरा गाउँपालिका वडा नम्बर ३ का वडा सचिब युवराज आचार्यले दुई दिनको तालिमबाट सहभागीहरुमा देखिएको उत्साहले खुसी बनाएको बताए । किशोरी र बालबालिकाहरुका लागि तालिम उपयोगी र प्रभावकारी भएको बताउँदै उनले आगामी दिनमा समेत वडामा रहेका बालबालिकाहरुको क्षमता अभिबृद्धिका लागि वडाले ध्यान दिने प्रतिबद्धता ब्यक्त गरे ।

कार्यक्रममा बोल्दै बास नेपालका कार्यकारी निर्देशक नमस्कार शाहले जीवन उपयोगी सीप ब्यवहारिक रुपमा महत्वपूर्ण हुने भन्दै सिकेको कुरालाई ब्यवहारमा लागू गर्न अनुरोध गरे । बास नेपालका केन्द्रीय अध्यक्ष शिव कुमार बर्माको अध्यक्षतामा भएको समापन कार्यक्रममा सहभागीहरुलाई प्रमाणपत्र प्रदान गरिएको थियो ।

तालिममा जीवन उपयोगी सीप, बाल अधिकार संरक्षण, जीवन उपयोगी सीपका तत्वहरुका बिषयमा खजुरा गाउँपालिका महिला तथा बालवालिका शाखा प्रमुख सुशिला न्यौपाने, बास नेपालका निर्देशक हेमराज भट्ट, जमुना चौधरी, शोभा भण्डारी, शोभा थापा मगर र रचना चौधरीले सहजीकरण गरेका थिए । खजुरा गाउँपालिका वडा नम्बर ३ का ३५ जना बाल क्लबका पदाधिकारी र किशोरीहरुको सहभागिता रहेको तालिम चैत्र २३ र २४ गते सञ्चालन भएको हो ।

प्रकाशित मिति: मंगलबार, चैत २४, २०८२ २१:०८

प्रतिक्रिया दिनुहोस्