नेपालगञ्जमा धुमधामसँग मनाइयो 'मोहम्मद डे'

स्थानीय

गृहपृष्ठ
स्थानीय
नेपालगञ्जमा धुमधामसँग मनाइयो 'मोहम्मद डे'

नेपालगञ्जमा धुमधामसँग मनाइयो 'मोहम्मद डे'

बुधबार, भदौ १०, २०८३ बागेश्वरी पोस्ट

नेपालगञ्ज । नेपालगञ्जसहित बाँकेका विभिन्न पालिकामा बुधबार मुस्लिम समुदायले इस्लाम धर्मका अन्तिम प्रवर्तक हजरत मोहम्मद सल्लल्लाहु अलैही वसल्लमको जन्मोत्सव ‘मोहम्मद डे’ धार्मिक श्रद्धा र उत्साहका साथ मनाएका छन् ।

इस्लामिक पात्रो हिजरी संवत्को तेस्रो महिना रवि उल अव्वलको १२ तारिखका दिन मनाइने पर्वका अवसरमा नेपालगञ्जमा बिहानैदेखि विशेष कार्यक्रम आयोजना गरिएको थियो । मुस्लिम समुदायका बालबालिका, युवा तथा अगुवाहरूले नेपाली राष्ट्रिय झण्डा र मदिनाको झण्डा बोकेर मोहम्मदी जुलुस निकालेका थिए ।

जामा मस्जिदबाट सुरु भएको जुलुस नेपालगञ्जका विभिन्न क्षेत्रको परिक्रमा गर्दै गौसिया मस्जिदमा पुगेर समापन भएको थियो । जुलुसमा सहभागीहरूले धार्मिक नारासहित पर्वको शुभकामना आदानप्रदान गरेका थिए ।

यस वर्षको जुलुसमा डिजे तथा ठूलो साउण्ड सिस्टमको प्रयोग नगरी धार्मिक मर्यादा अनुसार कार्यक्रम गरिएको छ । पर्वलाई व्यवस्थित र शान्तिपूर्ण बनाउन नेपालगञ्जका विभिन्न चोकमा सुरक्षा व्यवस्था पनि कडा पारिएको थियो ।

मोहम्मद डेको पूर्वसन्ध्यादेखि नै नेपालगञ्जका सडक, गल्ली, घर, टोल तथा मस्जिदहरू आकर्षक रूपमा सजाइएको थियो । विभिन्न स्थानमा धार्मिक प्रवचन तथा अन्य धार्मिक कार्यक्रमसमेत आयोजना गरिएका थिए ।

मुस्लिम समुदायले हजरत मोहम्मदको जन्मोत्सवलाई धार्मिक आस्था, सद्भाव र आपसी भाइचाराको सन्देश फैलाउने अवसरका रूपमा मनाएका छन् ।

मोहम्मद जयन्तीको अवसरमा बुधबार नेपालगञ्ज उपमहानगरपालिका, जानकी गाउँपालिका र नरैनापुर गाउँपालिकाले स्थानीय विदा दिएका छन् ।

प्रकाशित मिति: बुधबार, भदौ १०, २०८३ २१:११

प्रतिक्रिया दिनुहोस्