रसुवा बाढीपीडितका लागि सहयोग गर्न बाँके प्रशासनको अपिल

स्थानीय

गृहपृष्ठ
स्थानीय
रसुवा बाढीपीडितका लागि सहयोग गर्न बाँके प्रशासनको अपिल

रसुवा बाढीपीडितका लागि सहयोग गर्न बाँके प्रशासनको अपिल

बिहीबार, भदौ ११, २०८३ बागेश्वरी पोस्ट

नेपालगन्ज । जिल्ला प्रशासन कार्यालय बाँकेले रसुवाको भोटेकोशी नदीमा आएको बाढीबाट प्रभावित नागरिकको उद्धार, राहत तथा पुनःस्थापनाका लागि आर्थिक सहयोग गर्न जिल्लावासीमा अपिल गरेको छ ।

जिल्ला प्रशासन कार्यालय बाँकेले बिहीबार एक अपिल जारी गर्दै २०८३ भदौ १० गते भोटेकोशी नदीमा आएको बाढीबाट रसुवा, नुवाकोट, धादिङ लगायत जिल्लामा ठूलो जनधनको क्षति भएको भन्दै विपद्को यस घडीमा सहयोगका लागि आग्रह गरेको हो ।

अपिलमा बाढीमा परी ज्यान गुमाउनेहरूप्रति श्रद्धाञ्जली तथा घाइतेहरूको शीघ्र स्वास्थ्यलाभको कामना गर्दै प्रभावितको खोज, उद्धार र राहत कार्यलाई सरकारले तीव्रता दिइरहेको उल्लेख गरिएको छ । प्रभावितलाई सुरक्षित स्थानमा व्यवस्थापन गर्दै दीर्घकालीन रूपमा पुनःस्थापना गर्न आवश्यक रहेकाले आर्थिक सहयोग गर्न आग्रह गरिएको छ ।

जिल्ला प्रशासन कार्यालयले प्रधानमन्त्री तथा मन्त्रिपरिषद्को कार्यालयअन्तर्गत रहेको प्रधानमन्त्री दैवी प्रकोप उद्धार कोष र प्रधानमन्त्री राहत कोषमा रकम जम्मा गर्न सकिने जनाएको छ । प्रधानमन्त्री दैवी प्रकोप उद्धार कोषका लागि राष्ट्रिय वाणिज्य बैंक, नेपाल बैंक, कृषि विकास बैंक, एभरेस्ट बैंक, ग्लोबल आइएमई बैंक, नबिल बैंक, स्ट्यान्डर्ड चार्टर्ड बैंक नेपाल तथा हिमालयन बैंक (डलर खाता) का खाता विवरण सार्वजनिक गरिएको छ । प्रधानमन्त्री राहत कोषका लागि भने राष्ट्रिय वाणिज्य बैंकको खाता उपलब्ध गराइएको छ ।

सरकारले पनि रसुवा बाढीबाट प्रभावित नागरिकको उद्धार, राहत र दीर्घकालीन पुनःस्थापनाका लागि प्रधानमन्त्री दैवी प्रकोप उद्धार कोष तथा प्रधानमन्त्री राहत कोषमा आर्थिक सहयोग गर्न देशवासीलाई अपिल गरेको छ ।

जिल्ला प्रशासन कार्यालय बाँकेले विपद्को समयमा मानवीय सहयोगमा जुट्न सम्पूर्ण बाँकेवासी दाजुभाइ तथा दिदीबहिनीहरूमा आग्रह गरेको छ ।

प्रकाशित मिति: बिहीबार, भदौ ११, २०८३ १५:३४

प्रतिक्रिया दिनुहोस्