बाढीको विपद्का कारण ‘दौडिन्छिन् हजुरआमा’ कार्यक्रम स्थगित

स्थानीय

गृहपृष्ठ
स्थानीय
बाढीको विपद्का कारण ‘दौडिन्छिन् हजुरआमा’ कार्यक्रम स्थगित

बाढीको विपद्का कारण ‘दौडिन्छिन् हजुरआमा’ कार्यक्रम स्थगित

सोमबार, भदौ १५, २०८३ बागेश्वरी पोस्ट

नेपालगन्ज । दैनिक नेपालगन्जको प्रकाशन संस्था सम्यक मिडिया हबको आयोजनामा हुने भनिएको ‘द गोल्डन ग्राण्डमा’ अन्तर्गतको ‘दौडिन्छिन् हजुरआमा’ कार्यक्रम स्थगित गरिएको छ ।

भदौ २१ गते आयोजना गर्ने गरी तयारी अन्तिम चरणमा पुगेको कार्यक्रम भोटेकोशी नदीमा आएको बाढी तथा त्यसबाट उत्पन्न विपद्का कारण स्थगित गरिएको आयोजकले जनाएको छ ।

बाढी तथा विपद्का कारण देशका विभिन्न क्षेत्रमा जनधनको क्षति हुनुका साथै ठूलो संख्यामा नागरिक प्रभावित भएकाले यस्तो संवेदनशील अवस्थामा उत्सव केन्द्रित कार्यक्रमलाई प्राथमिकता दिनु भन्दा प्रभावित नागरिकको उद्धार, राहत तथा पुनःस्थापनामा सहयोग गर्नु प्रमुख दायित्व भएको आयोजकको भनाइ छ ।

‘द गोल्डन ग्राण्डमा’ ज्येष्ठ नागरिक महिलाको सक्रियता, स्वास्थ्य, आत्मविश्वास र सम्मान अभिवृद्धिसँगै पुस्ताबीचको सम्बन्ध बलियो बनाउने उद्देश्यले अघि बढाइएको अभियान भएको जनाइएको छ । विपद्को समयमा प्रभावित समुदायसँग ऐक्यबद्धता जनाउनु पनि अभियानको सामाजिक जिम्मेवारी भएको आयोजकले जनाएको छ ।

कार्यक्रमको पूर्व तयारी तथा आवश्यक व्यवस्थापनको काम करिब पूरा भइसकेको अवस्थामा स्थगित गर्नुपरेकोमा सहभागी, सहकार्य गर्ने संस्था, साझेदार, सहयोगी, स्वयंसेवक तथा शुभेच्छुकप्रति आयोजकले क्षमायाचना गरेको छ ।

कार्यक्रमको नयाँ मिति परिस्थितिको मूल्यांकनपछि तय गरी जानकारी गराइने संयोजक सजल गैरेद्वारा जारी प्रेस विज्ञप्तिमा उल्लेख छ । हाललाई अर्को निर्णय नभएसम्म कार्यक्रम स्थगित गरिएको हो ।

आयोजकले विपद्को यस घडीमा सरकारका उद्धार, राहत तथा पुनःस्थापनाका प्रयासमा सहयोग गर्न नागरिक, संघसंस्था तथा निजी क्षेत्रलाई अपिल गरेको छ । साथै विपद्मा ज्यान गुमाएकाप्रति श्रद्धाञ्जली, शोकसन्तप्त परिवारजनमा समवेदना तथा घाइतेको शीघ्र स्वास्थ्यलाभको कामना गरेको छ ।

प्रकाशित मिति: सोमबार, भदौ १५, २०८३ १८:४२

प्रतिक्रिया दिनुहोस्