बाढी पूर्वानुमानमा आधारित पूर्व कार्य सम्बन्धी अभिमुखीकरण

स्थानीय

गृहपृष्ठ
स्थानीय
बाढी पूर्वानुमानमा आधारित पूर्व कार्य सम्बन्धी अभिमुखीकरण

बाढी पूर्वानुमानमा आधारित पूर्व कार्य सम्बन्धी अभिमुखीकरण

सोमबार, असोज ५, २०८३ बागेश्वरी पोस्ट

नेपालगन्ज । नेपाल रेडक्रस सोसाइटी (नेरेसो) बाँके जिल्ला शाखाको आयोजनामा बाढी पूर्वानुमानमा आधारित पूर्व कार्य सम्बन्धी अभिमुखीकरण कार्यक्रम नेपालगन्जमा सम्पन्न भएको छ । कार्यक्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव राजेन्द्र शर्माले ‘पूर्वानुमानमा आधारित पूर्व कार्य राष्ट्रिय कार्यढाँचा–२०८३’ सम्बन्धी प्रस्तुतीकरण गरेका थिए ।

प्रस्तुतीकरणका क्रममा शर्माले पूर्वानुमानमा आधारित पूर्व कार्यलाई सुदृढ गर्दै विपद्बाट हुने जनधन तथा वातावरणीय क्षति न्यूनीकरण गर्न कार्यढाँचा तयार गरिएको बताए । आसन्न विपद्को अवस्थामा पूर्वसूचना प्रणालीलाई प्रभावकारी बनाउँदै विद्यमान संघीय शासन संरचना अनुसार बहुस्तर, अन्तर निकाय तथा विकास साझेदारबीच सहकार्य र समन्वयमार्फत पूर्वानुमानमा आधारित पूर्व कार्य सञ्चालन गर्ने उद्देश्य कार्य ढाँचाले लिएको उनले बताए ।

कार्यक्रम अन्तर्गत बाढी आउनु अघि समुदायमा पूर्व सूचना तथा पूर्व चेतावनी सम्प्रेषण गर्ने, जोखिममा रहेका समुदायलाई सुरक्षित स्थानमा स्थानान्तरण गर्ने तथा अस्थायी आश्रयस्थलमा खानेपानी, सरसफाइ तथा स्वच्छता, नगद सहायता लगायतका आवश्यक सेवा उपलब्ध गराउने योजना रहेको छ ।

बाढी पूर्वानुमानमा आधारित पूर्व कार्य सम्बन्धी कार्यक्रम बाँकेको राप्तीसोनारी, नरैनापुर र डुडुवा गाउँपालिकामा सञ्चालन भइरहेको छ ।

अभिमुखीकरण कार्यक्रममा तीन वटै गाउँपालिकाका जनप्रतिनिधि, विपद् फोकल पर्सन, नेपाल रेडक्रस सोसाइटीका पालिका शाखाका संयोजक, गैरसरकारी संघसंस्थाका प्रतिनिधि, नेरेसो बाँके जिल्ला कार्यसमितिका पदाधिकारी तथा कर्मचारीको सहभागिता रहेको थियो ।

नेरेसो विपद् तथा संकट व्यवस्थापन समितिका उपसंयोजक मीनबहादुर मल्लको अध्यक्षतामा सम्पन्न कार्यक्रममा नेरेसो बाँके शाखाका सभापति गोवर्धन सिंह सम्झना, मन्त्री अजीज अहमद सिद्दिकी, कोषाध्यक्ष राकेशबहादुर श्रीवास्तव, डुडुवा गाउँपालिका–१ का वडाध्यक्ष पटेश्वरी वर्मा, नरैनापुर गाउँपालिका–६ का वडाध्यक्ष प्रेमचन्द्र मौर्य लगायतको उपस्थिति रहेको थियो ।

अभिमुखीकरण कार्यक्रमको सहजीकरण राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव राजेन्द्र शर्मा र नेपाल रेडक्रस सोसाइटी केन्द्रीय कार्यालयका कार्यक्रम संयोजक प्रमोद अधिकारीले गरेका थिए । कार्यक्रमको सञ्चालन कार्यक्रम अधिकृत प्रह्लाद विश्वकर्माले गरेका थिए ।

प्रकाशित मिति: सोमबार, असोज ५, २०८३ १६:१५

प्रतिक्रिया दिनुहोस्