आँधी प्रभावितलाई सहयोग गर्न लाखौँ डलरको बन्दोबस्त

विश्व

गृहपृष्ठ
विश्व
आँधी प्रभावितलाई सहयोग गर्न लाखौँ डलरको बन्दोबस्त

आँधी प्रभावितलाई सहयोग गर्न लाखौँ डलरको बन्दोबस्त

बिहीबार, असोज ३०, २०७६ एजेन्सी

जापान । जापान सरकारले हागिबिस नाम दिइएको आँधीबाट पुगेको जनधनको क्षतिका लागि दशौं लाख अमेरिकी डलर विनियोजन गरेको जनाएको छ । जापानको इतिहासमा निकै शक्तिशाली मानिएको यस आँधीबाट देशभर कम्तीमा ७४ जनाको मृत्यु भएको थियो ।

हागिबिस आँधी गत शनिबार शुरु भएर देशैभर फैलिएको थियो । तीव्र वेग र वर्षाका कारण जनजीवन तहसनहस भएको थियो । देशका विभिन्न भागमा बाढी, पहिरो आएको थियो । बुधबार मध्यसम्ममा आँधीका कारण मृत्यु हुनेको संख्या ७४ पुगेको छ । अझै पनि दर्जनौँ मानिस बेपत्ता रहेको खोज तथा उद्धार निकायले जनाएका छन् ।

प्रधानमन्त्री सिन्जो आबेले आँधी प्रभावित क्षेत्रका लागि आपतकालीन कोषबाट खर्च गर्नेगरी तत्काल ६५ लाख अमेरिकी डलर विनियोजन गरिएको जानकारी दिए । सरकारले आँधी प्रभावित तीन सयभन्दा बढी नगरपालिकालाई अनुदानको रूपमा उक्त रकम वितरण गर्न लागेको हो ।

प्रधानमन्त्री आबेले जनजीवन जतिसक्दो चाँडो सामान्य बनाउन सरकारले कुनै कसर बाँकी नराख्ने दृढता व्यक्त गरेका छन् । बुधबार बिहानसम्म १० हजारभन्दा बढी घरपरिवारमा विद्युत सेवा उपलब्ध हुन सकेको छैन भने एक लाख १० हजारभन्दा बढी घरमा खानेपानीको अभाव छ ।

सरकारका प्रवक्ता योशिहिदे सुगाले आँधी प्रभावित इलाकामा खोज तथा उद्धारका कार्यलाई युद्धस्तरमा सञ्चालन गरिरहेको जानकारी दिए । निकै भारी वर्षा भएका कारण नदीहरूमा पानीको सतह बढेको र देखिएको जमिनमा पनि हिलो जमेको उनले बताए । प्रवक्ता योशिहिदेले स्थानीयलाई पहिरो आउन सक्ने खतराबारे सचेत रहन सूचना गरिएको बताए । आँधीबाट खासगरी देशको उत्तरपूर्वी भेग नराम्रोसँग प्रभावित भएको छ । फुकुसीमा क्षेत्रमा मात्र २६ जनाको ज्यान गएको थियो ।

प्रकाशित मिति: बिहीबार, असोज ३०, २०७६ १०:४१

प्रतिक्रिया दिनुहोस्