भागरथीको बलात्कारपछि हत्या गर्ने दिनेश भट्ट प्रहरीद्वारा सार्वजनिक

सुरक्षा-अपराध

गृहपृष्ठ
सुरक्षा-अपराध
भागरथीको बलात्कारपछि हत्या गर्ने दिनेश भट्ट प्रहरीद्वारा सार्वजनिक

भागरथीको बलात्कारपछि हत्या गर्ने दिनेश भट्ट प्रहरीद्वारा सार्वजनिक

बुधबार, फागुन ५, २०७७ बागेश्वरी पोस्ट

नेपालगन्ज । भागरथी भट्ट हत्यामा संलग्न आरोपीलाई प्रहरीले आज सार्वजनिक गरेको छ ।

बैतडीको दोगडाकेदार गाउँपालिका–७ मा १७ वर्षीया भट्टको बलात्कारपछि हत्यामा संलग्न दिनेश भट्टलाई प्रहरीले सार्वजनिक गरेको हो । भागरथी पढ्ने सनातन माध्यमिक विद्यालयमै कक्षा ११ मा पढ्ने छिमेकी समेत रहेका भट्टको घटनामा संलग्नता पुष्टि भएपछि सार्वजनिक गरिएको प्रहरीले जनाएको छ ।

जिल्ला प्रहरी कार्यालय बैतडीमा आयोजित पत्रकार सम्मेलनमा सुदूरपश्चिम प्रदेश प्रहरी प्रमुख उत्तमराज सुवेदीले प्राप्त प्राविधिक प्रमाण, प्रत्यक्षदर्शी, साबिती बयान लगायतका आधारमा भट्टलाई पक्राउ गरिएको बताउनुभयो । भट्टले प्रहरीसँग दिएको बयानमा प्रतिशोध साँध्न भागरथीको हत्या गरेको बताएका छन् । भागरथीको बुबाले आफ्नी फूपूलाई दुर्व्यवहार गरेकाले उनको हत्या गरेको भट्टले बताएको प्रहरीले जनाएको छ । घटनापछि उनी भागरथीको न्याय माग्दै भएको प्रदर्शनमा सहभागी भएका थिए । तर, उनको व्यवहार भने परिवर्तन भएको नजिकबाट चिन्नेहरुले बताएको प्रहरीले जनाएको छ ।

घटनास्थलको त्रुटिरहित ढंगले प्रमाण संकलन गरेर प्रयोगशालामा पनि केही प्रमाण पठाइएको सुवेदीले बताउनुभयो । उनी विरुद्ध ज्यान मुद्दामा म्याद थप गरेर विस्तृत अनुसन्धान हुने सुवेदीले बताउनुभयो । भट्टविरुद्ध भागरथीले दाईले किटानी जाहेरी समेत दिएका थिए ।

प्रकाशित मिति: बुधबार, फागुन ५, २०७७ १६:१८