झडपमा महिला प्रहरीको ज्यान गएपछि मोरङको लेटाङमा कर्फ्यु लगाइयो

सुरक्षा-अपराध

गृहपृष्ठ
सुरक्षा-अपराध
झडपमा महिला प्रहरीको ज्यान गएपछि मोरङको लेटाङमा कर्फ्यु लगाइयो

झडपमा महिला प्रहरीको ज्यान गएपछि मोरङको लेटाङमा कर्फ्यु लगाइयो

सोमबार, चैत ७, २०७८ बागेश्वरी पोस्ट

नेपालगन्ज । शिक्षकले आफ्नै विद्यालयकी एक छात्रालाई बलात्कार गरेको घटनामा उत्पन्न भएको झडपमा महिला प्रहरीको ज्यान गएपछि मोरङ जिल्लाको लेटाङका धेरैजसो क्षेत्रमा कर्फ्यु लगाइएको छ ।

लेटाङ ५ स्थित शिक्षा विकास माविका मनोज पौडेल नाम गरेका शिक्षकले सोही विद्यालयमा कक्षा ७ मा अध्ययनरत एक छात्रालाई बलात्कार गरेको घटना बाहिर आएपछि भएको झडपलाई शान्त पार्ने क्रममा खटिएकी एक प्रहरी महिलाको मृत्यु भएपछि उक्त क्षेत्र तनावग्रस्त बनेको हो । घटना नियन्त्रण भन्दा बाहिर गएपछि स्थानीय प्रशासनले आज बिहान ७ बजेदेखि सो क्षेत्रमा कर्फ्यू लगाएको छ । आइतबार दिउँसोको झडपपछि स्थिति तनावपूर्ण बनेकाले लेटाङ ५, खेरुवा वरपरको क्षेत्रमा अर्को आदेश जारी नहुन्जेलसम्मका लागि जिल्ला प्रशासन कार्यालय मोरङले कर्फ्यू लगाएको हो ।

जिल्ला प्रशासन कार्यालयले सूचना जारी गर्दै लेटाङको वडा ३ र ४ को पश्चिम एरिया गंगे चोक र कमलपुर क्षेत्र, ५ वडाको सबै क्षेत्र, उत्तरमा लेटांगको ६ नम्बर वडा कार्यालय क्षेत्र, पूर्वमा मोरङे खोला क्षेत्र, पश्चिममा चिस्याङ खोला क्षेत्रमा कर्फ्यू लगाएको जनाएको छ । एक प्रहरी महिला जवानको मृत्यु हुनुका साथै करिब अढाइ दर्जन घाइते भएका छन् । ती मध्ये केहीको अवस्था गम्भीर छ ।

शिक्षकले विद्यार्थीमाथि बलात्कार गरेको घटना बाहिर आएपछि आइतबार दिनभर विद्यालय परिसर तनावग्रस्त बन्यो । अभिभावक तथा छिमेकी विद्यालयबाट गएका विद्यार्थीहरू समेतले पीडितको पक्षमा र पीडक शिक्षकको विरुद्धमा नाराबाजी गरेका थिए ।

दोषी भनिएका शिक्षकलाई प्रहरीले सुरक्षा दिएर राखेको भन्दै आक्रोशित भीडले निजको मोटरसाइकल तथा विद्यालयमा समेत आगजनी गरेका थिए । घटना अझैसम्म साम्य नभएसँगै जिल्ला प्रशासनले कर्फ्यू लगाएको हो । आइतबार भएको झडपमा प्रहरी जवान उर्मिला श्रेष्ठको धारिलो चक्कु लागेर मृत्यु भएको प्रहरीले जनाएको छ ।

प्रकाशित मिति: सोमबार, चैत ७, २०७८ ०८:५३

प्रतिक्रिया दिनुहोस्