बाँकेमा २६० जना बालबालिका दादुरा संक्रमित

स्वास्थ्य

गृहपृष्ठ
स्वास्थ्य
बाँकेमा २६० जना बालबालिका दादुरा संक्रमित

बाँकेमा २६० जना बालबालिका दादुरा संक्रमित

दादुराको अवस्था बुझ्न स्वास्थ्य मन्त्री गिरी नेपालगञ्जमा

शनिबार, माघ ७, २०७९ बागेश्वरी पोस्ट

नेपालगञ्ज । बाँकेमा २६० जना बालबालिका दादुरा संक्रमित भएका छन् । आज थप १४ जना नयाँ विरामी फेला परेका छन् । पुस १२ गतेदेखि फैलिएको दादुरा जिल्लाका पाँच वटा पालिकामा देखिएको छ । नेपालगञ्ज, नरैनापुर, खजुरा, डुडुवा र कोहलपुरमा दादुरा देखिएको हो । संक्रमित मध्ये १९६ जना निको भएका छन् । ६३ जना घरमै उपचारमा छन् । नेपालगञ्जमा मात्रै हालसम्म २०३ जना बालबालिका दादुरा संक्रमित भएका छन् । यी मध्ये १७५ जना निको भएका छन् भने २७ जना घरमा आइसोलेसनमा रहेको जिल्ला स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । एक जनाको मृत्यु भएको छ ।

दादुरा फैलिएपछि पुस २२ गतेदेखि खोप अभियान जारी छ । ६ महिनादेखि १५ बर्षसम्मका बालबालिकालाई खोप लगाइँदैछ । नेपालगञ्जमा लक्ष्य भन्दा बढी १०३.८८ प्रतिशतलाई खोप लगाइएको छ । नेपालगञ्जमा ४४६४७ जनालाई दादुरा-रुबेला खोप लगाइएको खोप फोकल पर्सन जागेश्वर बस्नेतले जानकारी दिए । भोली पनि १० वडाका १० खोप केन्द्रबाट खोप लगाइँदैछ । डुडुवामा पनि आजदेखि खोप लगाउन थालिएको छ । आज पहिलो दिन ७१२ जना बालबालिकालाई दादुरा रुबेला खोप लगाइएको स्वास्थ्य शाखा प्रमुख धनबहादुर बुढाले बताए । भोली पनि यहाँका ६ वडाका ११ वटा खोप केन्द्रमार्फत खोप लगाइनेछ । नरैनापुर स्वास्थ्य शाखाका प्रमुख नागेन्द्रकुमार शाहका अनुसार नरैनापुरमा ९९१३ जना बालबालिकालाई खोप लगाइएको छ । भोली पनि यहाँका ६ वटै वडामा ९ खोप केन्द्र सञ्चालन गरेर खोप लगाइनेछ ।

यसैबीच स्वास्थ्य तथा जनसंख्या मन्त्री पदम गिरी दादुरा महामारी क्षेत्रको अवलोकनका लागि आज नेपालगञ्ज आएका छन् । मन्त्री गिरीले भोलि विहान ८ बजे नेपालगञ्ज उपमहानगरपालिका वडा नम्बर ५ स्थित आधारभूत स्वास्थ्य केन्द्र डिएसपी रोड पुगेर यहाँको अवस्थाबारे जानकारी लिने नेपालगञ्ज उपमहानगरपालिका स्वास्थ्य महाशाखा प्रमुख रामबहादुर चन्दले बताए । स्वास्थ्यमन्त्री गिरी नेतृत्वको टोलीले भोलि विहान ९ बजे भेरी अस्पतालको निरीक्षण पनि गर्नेछ ।

प्रकाशित मिति: शनिबार, माघ ७, २०७९, २१:४१:००

प्रतिक्रिया दिनुहोस्