जानकीमा पीपीआर खोप अभियान सञ्चालन

स्थानीय

गृहपृष्ठ
स्थानीय
जानकीमा पीपीआर खोप अभियान सञ्चालन

जानकीमा पीपीआर खोप अभियान सञ्चालन

बुधबार, चैत २१, २०८० बागेश्वरी पोस्ट

नेपालगञ्ज । बाँकेको जानकी गाउँपालिकामा घरपालुवा जनावरहरु महामारीको जोखिममा परेको भन्दै गाउँपालिकाले निःशुल्करुपमा पीपीआर खोप अभियान सञ्चालन गरेको छ । गाउँपालिकाले पहिलो चरणमा १५ हजार भेडाबाख्राहरुलाई पीपीआर भ्याक्सिन लगाउन सुरु गरेको हो । महामारीबाट जोगाउन ३ महिनामाथिका भेडाबाख्राहरुलाई भ्याक्सिन लगाउन सुरु गरिएको छ ।

जानकी गाउँपालिकाको पशु सेवा शाखाले १ देखि ६ नम्बर वडामा १० जना भ्याक्सिनेटरको टोली परिचालन गरेर यही चैत्र १८ गतेदेखि भ्याक्सिन लगाउने कार्यको सुरुवात गरेको हो । यो अभियान १ हप्तासम्म चल्ने गाउँपालिकाको पशु स्वास्थ्य शाखा प्रमुख दिलबहादुर खड्काले बताए । ६ वटै वडामा १८ गतेदेखि नै भ्याक्सिन लगाउन सुरु गरिएको शाखा प्रमुख खड्काले जानकारी दिए । पीपीआर रोग लागेमा भेडाबाख्रामा बढी ज्वरो आउने, नाकबाट बाक्लो सिँगान आउने, आँखामा बाक्लो कचेरा देखिने, मुखमा घाउ आएर खान नसक्ने र रगत मिसिएको दिसा गर्ने भएकाले समयमा औषधि उपचार नपाएमा मर्न सक्ने सम्भावना पनि आउन सक्ने पशु स्वास्थ्य शाखा प्रमुख खड्का बताउँछन् ।

घरपालुवा जनावरहरुमा लाग्ने रोगका कारण अहिलेको अवस्थामा किसानहरु मारमा परेको भन्दै भेडाबाख्राहरुमा रोग नलागोस् भनेर पीपीआरको भ्याक्सिन लगाउन सुरु गरिएको गाउँपालिकाका अध्यक्ष छब्बन खाँले बताए । स्थानीय सरकारप्रति जनताको हक अधिकार भएको बताउँदै उनीहरुको खुशी नै आफ्नो खुशी भएको अध्यक्ष खाँको भनाई छ ।

गाउँपालिकाले ल्याएको भ्याक्सिन कार्यक्रमले भेडाबाख्राहरुलाई बचाउन धेरै मद्दत गर्ने वडा नम्वर ३ की किसान मोमना बागवान बताउँछिन् । गाउँपालिकाले भेडाबाख्रामा लाग्ने महामारी विरुद्धको भ्याक्सिन अभियान सञ्चालन गरेपछि बागवान खुशी भएकी छन् ।

प्रकाशित मिति: बुधबार, चैत २१, २०८० २०:०८

प्रतिक्रिया दिनुहोस्