लक्ष्मण थापा स्मृति कप फुटबलको उपाधि युएनबिसीलाई

खेलकुद

गृहपृष्ठ
खेलकुद
लक्ष्मण थापा स्मृति कप फुटबलको उपाधि युएनबिसीलाई

लक्ष्मण थापा स्मृति कप फुटबलको उपाधि युएनबिसीलाई

बुधबार, फागुन १२, २०७७ लक्ष्मण बस्नेत

दाङ । दाङको तुलसीपुरमा संचालित नेपालका प्रथम सहिद क्याप्टेन लखन थापा स्मृति कप फुटबल प्रतियोगिता २०७७ को उपाधि युएनबिसी घोराहीले हात पारेको छ । नेपाल मगर युवा संघ तुलसीपुरको आयोजना तथा नेपाल मगर संघ तुलसीपुर नगर कमिटी र नेपाल मगर संघ जिल्ला समन्वय समिति दाङको संयुक्त ब्यबस्थापनमा तुलसीपुर अरनिको मैदानमा सम्पन्न फाइनल खेलमा युनाइटेड युथ क्लब तुलसीपुरलाई १ का विरुद्ध ३ गोल अन्तरले पाखा लगाउंँदै युएनबिसीले उपाधि हात पारेको हो । उपाधिसंगै उसले नगद १ लाख, कप मेडल तथा प्रमाणपत्र हात पार्‍यो । फाइनलमा हार ब्यहोरेको युनाइटेड उपबिजेतामा सिमित रहंँदै नगद ५० हजारमा चित्त बुझाउन बाध्य भयो ।

उल्लेख्य दर्शकको उपस्थितिमा भएको कडा प्रतिस्पर्धा र रोमाञ्चक खेलमा युएनबिसीका तर्फबाट खेलको १५ औंं मिनेटमा जर्सी नम्बर १० का एन्जस रोकाले पहिलो गोल गरे । त्यस्तै जर्सी नम्बर ७ का बिक्रम बिकले खेलको ३३ औं मिनेटमा गोल गरे भने ५६ औं मिनेट एन्जस रोकाले थप १ गोल गर्दै टिमलाई ३-१ को जित दिलाउन सफल भए । युनाइटेडका तर्फबाट खेलको ६६ औं मिनेटमा जर्सी नम्बर ७ सन्दिप बिकले जवाफी गोल गरे । जहांँनिया राणा शासनका विरुद्ध नेपाली जनताको मुक्तिका लागि बिद्रोह गर्ने क्रममा १९३३ साल फागुन २ गतेका दिन सहादत प्राप्त गरेका थापाको स्मृति दिवसका अवसरमा प्रतियोगिताको आयोजना गरिएको प्रतियोगिता अबधिभर रेफ्रीको भूमिकामा एन्फा रेफ्री शिवहरी शर्मा, डिएन दाहाल, बिनोद बिक, सुरेन्द्र चौधरी र आदेश केसी रहनुभएको छ ।

बिश्वब्यापीरुपमा फैलिएको कोरोना भाइरसका कारण ठप्प बनेको स्थानीय स्तरको खेल गतिविधिलाई चलायमान बनाउन सुरक्षा सम्बन्धि सम्पूर्ण मापदण्ड अपनाउंँदै संचालन गरिएको प्रतियोगितामा जिल्लाका २४ टिमको सहभागिता रहेको थियो । यसैवीच प्रतियोगिताको समापन समारोह आयोजक क्लबका अध्यक्ष घनश्याम पुनको अध्यक्षता तथा तुलसीपुर उपमहानगरपालिकाका मेयर घनश्याम पाण्डेको प्रमुख आतिथ्यता एवं जिल्ला प्रशासन कार्यालय सहायक प्रमुख जिल्ला अधिकारी चिरञ्जीवी राना मगर, नेपाल मगर संघका केन्द्रिय बरिष्ठ उपाध्यक्ष गुरु प्रसाद घर्तिमगर, नेपाल मगर बुद्ध सेवा समाज लुम्बिनी प्रदेश उपाध्यक्ष बलभद्र कुसारीको बिशिष्ट आतिथ्यतामा भएको थियो ।

प्राबिधिक संयोजक इन्द्र पुनको स्वागत रहेको कार्यक्रममा खेल अबधिभर उत्कृष्ट खेल प्रदर्शन गर्ने ब्यक्तिगत बिधातर्फ युनाइटेड क्लबका सन्दिप बिक बेस्ट प्लेयर, एसएसएफए तुलसीपुरका निशान डांँगी राइजिङ प्लेयर, बेस्ट डिफेन्स युनएनबिसीका दिपेनसिंह ठकुरी, बेस्ट स्कोरर युएनबिसीका आकाश बुढामगर, मिडफिल्डर युनाइटेडका निशान न्यौपाने, बेस्ट स्टाइकर युनबिसीका एन्जस रोका, बेस्ट किप्पर युएनबिसीका जिनेश केसी, बेस्ट कोच युएनबिसीका सन्दिप ओली, बेस्ट टिम म्यानेजर युनाइटेडका प्रीति भण्डारी र फेयर प्लेय टिम नवलपुर फुटबल क्लबलाई घोषित गरिएको थियो ।

त्यस्तै सो अबसरमा १३ औं साग प्रतियोगितामा दाङ जिल्लाबाट नेपालको प्रतिनिधित्व गर्दै खोखो खेलमा मेडल दिलाउन सफल खेलाडी तथा प्रशिक्षकलाई सम्मान गरिएको थियो । प्रशिक्षक उषा कंँवर मगर, रजत पदकधारी खेलाडी सुमित्रा चौधरी, कास्यपदक पदकधारी खेलाडी बेद बहादुर ओली सम्मानित हुनुभएको हो । नेपाल मगर संघ तुलसीपुर कमिटीका अध्यक्ष राम कुमार घर्तिले संचालन गर्नुभएको कार्यक्रममा मगर संस्कृति झल्कने विभिन्न नृत्य प्रस्तुत गरिएको थियो ।

प्रकाशित मिति: बुधबार, फागुन १२, २०७७ २१:००

प्रतिक्रिया दिनुहोस्