सिडियोलाई तत्काल जिल्ला छोड्न तरुण दलको चेतावनी

राजनीति

गृहपृष्ठ
राजनीति
सिडियोलाई तत्काल जिल्ला छोड्न तरुण दलको चेतावनी

सिडियोलाई तत्काल जिल्ला छोड्न तरुण दलको चेतावनी

शुक्रबार, मंसिर २०, २०७६ बागेश्वरी पोस्ट

दोलखा । दोलखाका प्रमुख जिल्ला अधिकारी (सिडियो) खगेन्द्रप्रसाद रिजालले ३ जना अभियुक्तलाई धरौटीमा रिहा गर्न भन्दै लिएको एक लाख २५ हजार रुपैयाँ रकम फिर्ता गरेको अभियुक्त र उनका आफन्तले दाबी गरेका छन्।

प्रजिअ रिजालले बिहीबार दिउँसो छुट्टाछुट्टै २ घटनाका ३ जना अभियुक्त र उनीहरूका आफन्तलाई जिल्ला प्रशासन कार्यालयमा बोलाई आफ्नै क्वाटरमा लगेर पैसा फिर्ता गरेको अभियुक्तले दाबी गरेका हुन्।

बुहारीलाई तातोपानी खन्याएर पोलिदिएको आरोप लागेका कालिञ्चोक गाउँपालिका–१ का बाबु/छोरा उदिम तामाङ र इन्द्रबहादुर तामाङले प्रजिअ रिजालले आफूहरुबाट लिएको घुस फिर्ता गरेको बताएका हुन् ।

रिजालले मंसिर १७ गते १४ हजार रुपैयाँ धरौटी रसिद काटेर लिएको र बाँकी ३५ हजार रकम बिनारसिद लिएर घर्रामा राखेको समेत बाबु/छोराको आरोप छ ।

त्यस्तै जनप्रतिनिधिलाई कुटपिट गरेको आरोपमा सार्वजनिक मुद्दा खेपिरहेका मेलुङ गाउँपालिका–४, भेड्पुका कुमार लामा मोक्तानले पनि प्रजिअ रिजालले आफूबाट लिएको घुस फिर्ता गरेको बताएका छन् । धरौटीमा रिहा गर्न भन्दै रिजालले एक लाख रुपैयाँ लिएर १० हजार रुपैयाँको धरौटी रसिद दिएको उनको भनाइ छ ।

प्रजिअ रिजालमाथि उदिम, इन्द्रबहादुर र कुमारलाई धरौटीमा रिहा गर्न घुस लिएको आरोप लागेको छ । योसँगै उनी विवादमा तानिएका छन् ।

तर प्रजिअ रिजालले प्रक्रियागत त्रुटि भएको बताएका छन्। अभियुक्तबाट पीडित भएकाहरूको उपचार माग दाबी आएमा क्षतिपूर्ति भुक्तानी दिन उक्त रकम राखिएको दाबी गरेका छन् ।

रिजाल अख्तियार दुरुपयोग अनुसन्धान आयोग दोलखाका जिल्ला प्रतिनिधि समेत हुन् ।

यता प्रतिवादीबाट कार्यकक्षमै घुस मागेर विवादमा तानिएका रिजालविरुद्ध चरिकोटमा तरुण दलले शुक्रबार प्रदर्शन गरेको छ। प्रतिवादीलाई धरौटीमा छाड्ने आदेश गर्दा प्रजिअ रिजालले प्रतिवादीका परिवारबाट सवा लाख रुपैयाँ लिएको घटना सार्वजनिक भएपछि दलले चरिकोटमा प्रदर्शन गरेको हो।

प्रदर्शनमा सहभागी तरुण दलका नेता/कार्यकर्ताले रिजाललाई तत्काल जिल्ला छोड्न चेतावनी समेत दिएका छन् । उनीहरुले सिडियो रिजाललाई कारबाही गर्न समेत सरकारसँग माग गरेका छन् ।

प्रकाशित मिति: शुक्रबार, मंसिर २०, २०७६ १२:०७

प्रतिक्रिया दिनुहोस्