कांग्रेस कोषाध्यक्ष बस्नेत सर्वाधिक मतसहित प्रदेश प्रतिनिधिमा निर्वाचित

राजनीति

गृहपृष्ठ
राजनीति
कांग्रेस कोषाध्यक्ष बस्नेत सर्वाधिक मतसहित प्रदेश प्रतिनिधिमा निर्वाचित

कांग्रेस कोषाध्यक्ष बस्नेत सर्वाधिक मतसहित प्रदेश प्रतिनिधिमा निर्वाचित

मंगलबार, असोज १३, २०८३ बागेश्वरी पोस्ट

नेपालगन्ज । नेपाली कांग्रेसको १५औँ महाधिवेशन अन्तर्गत बाँके प्रतिनिधिसभा क्षेत्र नम्बर २ र प्रदेशसभा क्षेत्र नम्बर २ (ख) को सोमबार सम्पन्न निर्वाचनमा कांग्रेस बाँकेका कोषाध्यक्ष यज्ञबहादुर बस्नेत सर्वाधिक मतसहित लुम्बिनी प्रदेश अधिवेशन प्रतिनिधिमा निर्वाचित भएका छन् ।

लुम्बिनी प्रदेश अधिवेशन प्रतिनिधिको खुलातर्फ ८ पदका लागि ११ जना उम्मेदवारबीच प्रतिस्पर्धा भएको थियो । बस्नेतले खसेको कुल ३३८ मतमध्ये २३० मत प्राप्त गर्दै सबैभन्दा बढी मत ल्याएका हुन् । बस्नेतले प्रतिनिधिसभा क्षेत्र नम्बर २ का नवनिर्वाचित क्षेत्रीय सभापति नरेन्द्रकुमार चौधरी नेतृत्वको समूहबाट उम्मेदवारी दिएका थिए । चौधरी समूहबाट प्रदेश अधिवेशन प्रतिनिधिमा ६ जना निर्वाचित हुँदा क्षेत्रीय सभापतिमा पराजित विरेन्द्र शाह समूहबाट दुई जना मात्रै निर्वाचित भएका छन् ।

कांग्रेस बाँकेमा चार वर्षदेखि कोषाध्यक्षको जिम्मेवारी सम्हाल्दै आएका बस्नेतले आफूलाई प्राप्त मतप्रति खुसी व्यक्त गर्दै पार्टीका नेता, कार्यकर्ता तथा प्रतिनिधिहरूप्रति आभार व्यक्त गरेका छन् । “म धेरै खुसी छु । सबैको साथ र विश्वास पाएँ । चार वर्षे कोषाध्यक्षको कार्यकालमा सबैसँग राम्रो समन्वय गरेर काम गर्ने अवसर पाएँ, त्यसकै निरन्तरता र विश्वास निर्वाचनको परिणाममा पनि देखिएको छ,” उनले भने ।

प्रदेश अधिवेशन प्रतिनिधिमा निर्वाचित भएसँगै बस्नेतले अब लुम्बिनी प्रदेशमा पदाधिकारीका लागि प्रतिस्पर्धा गर्ने चाहना समेत व्यक्त गरेका छन् । उनले पार्टी संगठनलाई थप सुदृढ बनाउन प्रदेश तहमा भूमिका निर्वाह गर्ने आफ्नो इच्छा रहेको बताए ।

प्रकाशित मिति: मंगलबार, असोज १३, २०८३ १८:५२

प्रतिक्रिया दिनुहोस्