नरैनापुरले विपद् सूचना व्यवस्थापन पोर्टल सञ्चालन गर्ने

स्थानीय

गृहपृष्ठ
स्थानीय
नरैनापुरले विपद् सूचना व्यवस्थापन पोर्टल सञ्चालन गर्ने

नरैनापुरले विपद् सूचना व्यवस्थापन पोर्टल सञ्चालन गर्ने

बिहीबार, असोज ६, २०७९ बागेश्वरी पोस्ट

नरैनापुर (बाँके) । बाँकेको नरैनापुर गाँउपालिकाले विपद् जोखिम न्यूनीकरण तथा व्यवस्थापनका लागि विपद् सूचना व्यवस्थापन प्रणाली लागू गर्ने भएको छ ।

नरैनापुर गाउँपालिकामा सेभ द चिल्ड्रेनको सहयोगमा एसडिएफले आयोजना गरेको पोर्टल स्थानीयकरण सम्बन्धि अभिमुखीकरण कार्यशालामा बोल्दै नरैनापुर गाउँपालिकाका अध्यक्ष इश्तियाक अहमद शाहले पोर्टलमार्फत् विपद्को तयारी, प्रतिक्रिया, सतर्क, जोखिम सम्बन्धि जानकारीका साथै क्षमता र संशोधनका विभिन्न तथ्याङ्क र सूचना लिन सहज हुने भएकाले उक्त पोर्टल सञ्चालनका लागि गाउँपालिकाले भूमिका खेल्ने बताए ।

कार्यशालालाई सहजीकरण गर्दै आइ.एच.आर.आर का टिम लिडर सुरज गौतमले विपद् पोर्टलले विपद् जोखिम न्यूनीकरण तथा व्यवस्थापनको लागि चाहिने पूर्व तयारी, पूर्व चेतावनी र प्रतिकार्यमा सुदृढ पार्ने क्षमता राख्नुका साथै यसले विपद् जोखिमको सञ्चार र विपद् पछिको घटनामा समन्वय गर्न र तथ्यमा आधारित रहेर विपद् जोखिम न्यूनीकरणसँग सम्बन्धित योजना तर्जुमा गर्न तथा स्थानीयस्तरमा निर्णय लिन र नीति बनाउन समेत मद्दत पु¥याउने बताए । उनले पोर्टल सञ्चालनका लागि आफूहरुले प्राविधिक सहयोग गर्ने प्रतिबद्धता व्यक्त गरे ।

कार्यशालामा सेभ द चिल्ड्रेनका बरिष्ठ कार्यक्रम संयोजक शेर रौलेले विपद् पोर्टलले जल विज्ञान र मौसम सम्बन्धि जोखिमहरु भारी वर्षा र बाढी, वातावरणीय जोखिम जलवायु प्रदूषण र भूकम्प जस्ता भूवर्गीय जोखिमको सूचना दिनुका साथै चेतावनी वा खतरा सीमा पार गर्दा विपद् पोर्टलमा चेतावनी सूचना प्रदर्शित हुने बताए । उनले गाउँपालिकासंग सहकार्य गरेर वडा स्तरबाट तथ्यांक संकलन गरी दुई महिनाभित्रै पोर्टल सञ्चालनमा ल्याउने तयारी गरेको जानकारी गराएका थिए ।

पोर्टल सञ्चालनमा ल्याउनका लागि एसडीएफलाई प्राविधिक सहयोग गर्दै आएको नक्साका सुमिता मानन्धर र रोजिना ढकालले प्रकोप सम्बन्धि कागजात, स्थानीय, वार्ड र समुदायस्तरमा प्रकोप व्यवस्थापन समितिका सदस्यको सम्पर्क जानकारी, स्थानीय सरकारले प्रकोप जोखिम न्यूनीकरण र व्यवस्थापन परियोजना सम्बन्धि डाटा र जानकारी एकीकृत गर्न पोर्टल सञ्चालनमा ल्याउन जरुरी रहेको बताउँदै पोर्टल सञ्चालनका लागि आवश्यक पर्ने प्राविधिक सहयोग गर्ने प्रतिबद्धता व्यक्त गरेका थिए ।

कार्यक्रममा नरैनापुर गाँउपालिका प्रमुख प्रशासकिय अधिकृत मणिराम खरालले विपद् पोर्टलमा नेपाल सरकारका विभिन्न निकाय, विपदमा कार्य गरिरहेका सङ्घसंस्थाबाट तयार गरिएका सूचना तथा तथ्याङ्कले गाउँपालिकाको रणनीति योजना बनाउन सहज हुने बताए । उनले पोर्टल सञ्चालनमा आइसकेपछि सूचना र तथ्याङ्कलाई थप अद्यावधिक गर्ने प्रतिबद्धता व्यक्त गरेका थिए ।

नरैनापुर गाउँपालिका अध्यक्ष शाहको अध्यक्षतामा भएको कार्यशालामा उपाध्यक्ष जयन्तीदेबी श्रीवस्तव, प्रमुख प्रशासकिय अधिकृत खराल, वडा नं. १ का अध्यक्ष इशाक जोलाह, वडा नं. २ का अध्यक्ष मसूद अहमद शाह, वडा नं. ३ का अध्यक्ष अजय मिश्रा, वडा नं. ४ का अध्यक्ष मनोज शर्मा, वडा नं. ६ का अध्यक्ष प्रेम मौर्य, विपद् शाखाका प्रमुख लक्ष्मीकान्त शर्मा लगायत उपस्थित थिए ।

प्रकाशित मिति: बिहीबार, असोज ६, २०७९ १२:४२

प्रतिक्रिया दिनुहोस्