बिगतमा कस्ले कति काम गरे ? समिक्षा गरेर मत दिनुस : दीपक गिरी

आम निर्वाचन-२०७९

गृहपृष्ठ
आम निर्वाचन-२०७९
बिगतमा कस्ले कति काम गरे ? समिक्षा गरेर मत दिनुस : दीपक गिरी

बिगतमा कस्ले कति काम गरे ? समिक्षा गरेर मत दिनुस : दीपक गिरी

मंगलबार, कात्तिक २९, २०७९ बागेश्वरी पोस्ट

तुलसीपुर । दाङ क्षेत्र नम्बर ३ का प्रतिनिधिसभा सदस्य पदका उम्मेदवार दीपक गिरीले बिगतमा गरेका कामलाई मूल्यांकन गरेर मत दिन मतदातालाई आग्रह गरेका छन् । मंगलवार तुलसीपुर उपमहानगरपालिका वडा नं. ४ खाद्रेमा आयोजित चुनावी सभालाई सम्बोधन गर्दै गिरीले भने, ‘इतिहासमा कसले के–कति काम गरे, म आफू पनि मन्त्री हुँदा पनि जिल्लामा विकासका कामहरु कति भए बुझ्नुस् तब मात्र मत दिनुस् ।’

त्यस्तै उनले वली सरकारले मुलुकको राष्ट्रियता र संविधानलाई धरापमा पार्न खोजिरहँदा यसको रक्षाका लागि गठबन्धन बनेको तर्क गरे । उनले भने, ‘जतिबेला म तपाईंहरुको अभिमतले मन्त्री थिएँ, त्यो बेला दाङको मुहार बदल्ने पर्यत्न गरे, धेरै बोरिङ, तटबन्धनका कामहरु भए, ती पर्याप्त भएनन्, किसानहरुकै सहजताका लागि बृहत सिंचाई आयोजना तुलसीपुरमा स्थापना गरें, जसका कारण आज ती किसानहरुले सिन्चित गर्न पाइराखेका छन् ।’ नेपाली कांग्रेसका केन्द्रिय सदस्य तथ पूर्व मन्त्री समेत रहेका गिरीले जिल्लामा धुलाम्य सडक कालोपत्रे गर्ने, जलासय, खानेपानी, महिला तथा युवाहरुलाई स्वरोजगारका कार्यक्रमहरु संघिय सरकारबाट बजेट बिनियोजन गरेर योजनाबद्ध तरिकाले सञ्चालन गर्ने प्रतिबद्धता जनाए । उनले चमेरीगुफा/खुमखानीको क्षेत्रलाई पर्यटकीय स्थल बनाउन जरुरी रहेको बताउँदै सबैभन्दा पहिलो सबै बाटो कालोपत्रे गरेर बाह्य पर्यटकहरु आउने गरी यसको विकास गर्ने समेत बताए ।

कार्यक्रममा दाङ क्षेत्र नं. ३ (क) का प्रदेश सभा सदस्य पदका उम्मेदवार डिल्ली बहादुर चौधरीले तुलसीपुरलाई नामको मात्र उपमहानगरपालिका बनाइएको तर्क गरे । ‘पहिलेका मेयरले ऋणको भारी बोकाएर जानुभो, अहिले त सबै पैसा सकिएपछि सुत्केरी भत्ता समेत रोकिएछ ।'

चौधरीले भने, ‘नेता धनी बन्ने जनतालाई गरिब बनाउन काम भयो, चिन्ता नगर्नुहोस् अब हामीले यस ठाँउलाइ बिकास गरेर देखाउछौँ ।’ उनले प्रतिपक्षले स्मार्ट सिटी र पानी जहाज जस्ता ठुलो सपना नदेखाई विकास निर्माणका कामलाई पहिलो प्राथमिकतामा राखेर अघि बढ्ने धारणा राखे । साथै उनले प्रदेश सरकनरबाट बजेट बिनियोजन गरेर खाद्रेदेखि खुमखानीसम्म जाने सडकलाई कालोपत्रे गर्ने बताए ।

नेपाली कांग्रेस तुलसीपुर ४ का सभापति नन्दलाल पुनको अध्यक्षतामा भएको कार्यक्रममा क्षेत्र नं. ३ का समानुपातिक पदका उम्मेदवार देबिका नेपाली, नेकपा माओवादी केन्द्रका केन्द्रिय सदस्य शेसुराम भण्डारी, माओवादी केन्द्र तुलसीपुर नगरका काबा अध्यक्ष मोहन थापा लगायतले मुलुकको समृद्धिका लागि गठबन्धनका उम्मेदवारहरुलाई जिताउन अपिल गरेका थिए । उक्त कार्यक्रम सहजीकरण नेपाली कांग्रेस तुलसीपुर नगरका सदस्य कृष्ण खड्काले गरेका थिए । त्यस कार्यक्रममा राष्ट्रिय प्रजातन्त्र पार्टी परित्याग गरी ७ जना नेपाली कांग्रेसमा प्रवेश गरेका थिए ।

यसैबीच मंगलवार तुलसीपुर उपमहानगरपालिका वडा नं. ८ को कट्कुइँया, जुम्लेकुला, तुलसीपुर ३ रानागाउँ लगायतका स्थानमा घरदैलो तथा भेटघाट कार्यक्रम सम्पन्न भएका छन् ।