डिएलएको वरिष्ठ उपाध्यक्षमा कार्कीले उम्मेदवारी दिँदै

स्थानीय

गृहपृष्ठ
स्थानीय
डिएलएको वरिष्ठ उपाध्यक्षमा कार्कीले उम्मेदवारी दिँदै

डिएलएको वरिष्ठ उपाध्यक्षमा कार्कीले उम्मेदवारी दिँदै

सोमबार, जेठ २२, २०८० बागेश्वरी पोस्ट

नेपालगञ्ज । नेपाल डेमोक्रयाटिक लयर्स एसोसिएशन (डिएलए) को यही २६ गते हुने ११औं महाधिवेशनमा वरिष्ठ उपाध्यक्ष पदमा नेपालगञ्जका कानुन व्यवसायी प्रहलादबहादुर कार्कीले उम्मेदवारी दिने भएका छन् । ४ दशकदेखि कानुन व्यवसायमा संलग्न अधिवक्ता कार्कीले आज नेपालगञ्जमा औपचारिकरुपमा पत्रकारमाझ वरिष्ठ उपाध्यक्षमा उम्मेदवारी दिने बताएका हुन् ।

डिएलए र नेपाल बार एसोसिएशनको केन्द्रीय उपाध्यक्ष समेत भइसकेका कार्कीले यसअघिको महाधिवेशनमै अध्यक्ष पदमा उम्मेदवारी दिएपनि सहमतिमा फिर्ता लिएको तर यसपाली भने वरिष्ठ उपाध्यक्षमै उम्मेदवारी दिने उद्घोष गरे । कार्यसमितिमा वरिष्ठ उपाध्यक्ष एक जना र महिला उपाध्यक्षसहित ८ जना उपाध्यक्ष हुने व्यवस्था रहेको छ ।

स्थायीरुपमै काठमाडौं बस्न सक्ने अवपस्था नरहेको लगायतका प्राविधिक कारण देखाउँदै कार्कीले वरिष्ठ उपाध्यक्षका लागि आफू पूर्णरुपमा सक्षम र उपयुक्त भएको दावी गरे । डिएलएमा जिल्लादेखि केन्द्रको विभिन्न तहमा रहेर अनुभव संगालीसकेकाले अब वरिष्ठ उपाध्यक्षमा रहेर कानुन व्यवसायीको हकहित संरक्षण र संस्थागत विकासमा योगदान पु¥याउने बताए । विगतमा डिएलएका लागि गरेको योगदान, देशभरका कानुन व्यवसायीहरुको हौसला र साथले आफू वरिष्ठ उपाध्यक्षमा निर्वाचित हुने उनले ठोकुवा समेत गरे ।

कार्कीले वरिष्ठ उपाध्यक्षमा उम्मेदवारी घोषणा गरिरहँदा डिएलए बाँके अध्यक्ष जनकबहादुर शाही, उच्च अदालत बार एशोसिएशन नेपालगञ्जका अध्यक्ष चित्रबहादुर शाही, पुनरावेदन अदालत बार एशोसिएशन नेपालगञ्जका पूर्व अध्यक्ष लोकबहादुर शाह, डिएलए बाँकेका पूर्व अध्यक्ष इश्वरी ज्ञवाली पनि साथमै थिए । ज्ञवालीले पनि लुम्बिनी प्रदेशबाट उपाध्यक्ष पदमा उम्मेदवारी दिने घोषणा गरेका छन् ।

प्रकाशित मिति: सोमबार, जेठ २२, २०८० १८:१९