कोहलपुरमा साढे ३० करोडमा निर्मित अत्याधुनिक बसपार्क उद्घाटन

स्थानीय

गृहपृष्ठ
स्थानीय
कोहलपुरमा साढे ३० करोडमा निर्मित अत्याधुनिक बसपार्क उद्घाटन

कोहलपुरमा साढे ३० करोडमा निर्मित अत्याधुनिक बसपार्क उद्घाटन

आइतबार, असार २४, २०८० बागेश्वरी पोस्ट

नेपालगञ्ज । बाँकेको कोहलपुरमा नवनिर्मित अत्याधुनिक बसपार्क उद्घाटन गरिएको छ । लुम्बिनी प्रदेशका मुख्यमन्त्री डिल्लीबहादुर चौधरीले आज एक कार्यक्रमका बीच लामो दुरीको नवनिर्मित बसपार्क उद्घाटन गरेका हुन् ।

बसपार्क उद्घाटन गर्दै मुख्यमन्त्री चौधरीले कोहलपुर पश्चिम नेपालको गेटवे भएको बताउँदै कोहलपुर क्षेत्रको विकास र समृद्धिका लागि लुम्बिनी प्रदेश सरकारको साथ र सहकार्य रहने प्रतिबद्धता व्यक्त गरे । जीवनोपयोगी सीप सिक्ने वातावरण निर्माण गर्दै रोजगारी प्रबद्र्धन गर्ने प्रदेश सरकारको योजना रहेको सुनाउँदै मुख्यमन्त्री चौधरीले विकास र समृद्धिका लागि प्रदेश सरकार र स्थानीय सरकारका बीचमा समन्वय, समझदारी र सहकार्य जरुरी रहेको उल्लेख गरे । कोहलपुरमा यो क्षेत्रकै अत्याधुकि बसपार्क बनेको भन्दै उनले खुसी ब्यक्त गरे ।

No description available.

कोहलपुर नगरपालिका प्रमुख पूर्णप्रसाद आचार्यले नगरको विकास र समृद्धिका लागि समन्वय र सहकार्य गरिरहेको बताए । कोहलपुर नगरपालिका प्रमुख प्रशासकीय अधिकृत टिकाराम ढकालले सुविधा सम्पन्न लामो दुरीको बसपार्कको आर्थिक प्रतिवेदन प्रस्तुत गरेका थिए । लुम्बिनी प्रदेशकासभा सदस्य कृष्णा केसी नमुना, सञ्जुकुमारी चौधरी, दुर्गा चौधरी, बसन्ती अधिकारी लगायतले कोहलपुरकै विकास र समृद्धिका लागि पहलकदमी लिइरहेको बताउँदै जिल्लाको विकास र समृद्धिका लागि सबै एकजुट भएर काम गर्ने प्रतिबद्धता व्यक्त गरे ।

अत्याधुनिक सपिंग कम्प्लेक्ससहितको बसपार्क साढे ३० करोड लागतमा निर्माण सम्पन्न भएको हो । नगर विकास कोषसंगको ऋण सम्झौतामा कोहलपुर नगर विकास समितिले बसपार्क निर्माण गरेको हो । नगर विकास कोषको ६० प्रतिशत र कोहलपुर नगर विकास समितिको ४० प्रतिशत लगानीमा बसपार्क निर्माण सम्पन्न भएको कोहलपुर नगरपालिकाले जनाएको छ । बार्षिक ८ प्रतिशत व्याज रकम तिर्ने गरी २० बर्षका लागि नगर विकास कोषसंग सम्झौता भएको छ । २०७७ असोज २३ गते तत्कालीन नगर प्रमुख लुटबहादुर रावतले नगर विकास कोषससंग सम्झौता गरेका हुन् । २०७७ फागुन २४ गतेबाट बसपार्क निर्माण कार्य सुरु गरिएको थियो । २०७९ फागुन २५ गते निर्माण सम्पन्न भएको थियो ।

बसपार्क निर्माण सम्पन्न भएसंगै कोहलपुर नगरपालिकाले बसपार्क सञ्चालनका लागि ठेक्का सम्झौता गर्नुका साथै बसपार्कभित्र रहेका सटरहरु समेत भाडामा दिइसकेको छ । बसपार्क साउनदेखि सञ्चालनमा आउनेछ । बसपार्कको समग्र व्यवस्थापनको जिम्मा बागेश्वरी यातायात व्यवसायी प्रालिले पाएको छ । प्रालिले बसपार्क व्यवस्थापनका लागि प्रवेश, टिकट काउन्टर, शौचालय मर्मत सम्भार, ब्लक र पार्किङको सम्पूर्ण व्यवस्थापन गर्नेछ । बसपार्कमा व्यापारिक प्रयोजनका लागि ५९ वटा सटर छन् ।