'नेपालगञ्जमा इ–रिक्सा व्यवस्थापन प्राथमिकतामा'

स्थानीय

गृहपृष्ठ
स्थानीय
'नेपालगञ्जमा इ–रिक्सा व्यवस्थापन प्राथमिकतामा'

'नेपालगञ्जमा इ–रिक्सा व्यवस्थापन प्राथमिकतामा'

सोमबार, असोज १५, २०८० बागेश्वरी पोस्ट

नेपालगञ्ज । नेपालगञ्जमा इ–रिक्सा व्यवस्थापनलाई प्राथमिकता दिएर काम अगाडि बढाइएको छ । नेपालगञ्ज उपमहानगरपालिकाले इ–रिक्सा व्यवस्थापन गर्न कार्यविधि नै बनाएर काम गरिरहेको छ । उपमहानगरपालिकाले इ–रिक्सा सञ्चालन, व्यवस्थापन तथा नियमन सम्बन्धि कार्यविधि–२०७८ निर्माण गरेर व्यवस्थापनमा अग्रसरता देखाएको हो । कार्यविधि अनुसार व्यवस्थापनको जिम्मेवारी पाएको इ–रिक्सा व्यवस्थापन कम्पनी प्रालिले पछिल्लो समय सक्रिय भएर काम गरिरहेको बताएको छ ।

इ–रिक्सा व्यवस्थापन कम्पनी प्रालिका अध्यक्ष कुमार सिंह ठकुरीले विगतमा देखिएका कमी-कमजोरीबाट सिक्दै नेपालगञ्जमा इ–रिक्सा व्यवस्थापनका लागि चरणवद्धरुपम काम गरिरहेको बताए । ठकुरीले पहिलो चरणमा चालकहरुलाई अस्थायी अनुमती-पत्र वितरण गर्ने, नगरपालिकामा सूचिकृत गर्ने, बिमा अनिवार्य गर्ने र अभिमुखीकरण कार्यक्रम गरिरहेका्े जानकारी दिए । पछिल्लो समय केही सञ्चार माध्यममा इ–रिक्सा व्यवस्थापनको विषयलाई लिएर गलत समाचार आइरहेको भन्दै उनले त्यसमा सत्यता नभएको जिकिर गरे ।

‘हामीले कुनै गैरकानुनीरुपमा काम गरिरहेका छैनौं । उपमहानगरपालिकाले बनाएको कार्यविधि अनुसार हामीले खुला बोलपत्रमार्फत ठेक्का पाएर काम गरिरहेका छौं । हामीले रिक्सा चालक र यात्रीको सुरक्षालाई ध्यानमा दिएर काम गरिरहेका छौं यसमा सबैको सहयोगको आवश्यकता छ,’ उनले भने ।

ठकुरीका अनुसार नगरमा करिब १० हजार इ–रिक्सा छन् । तिनको व्यवस्थापन आफैंमा चुनौतीपूर्ण रहेको उनको भनाई छ । उपमहानगरपालिकाले इ–रिक्सा व्यवस्थापनको लागि भाडादर निर्धारण गरेता पनि कार्यान्वयन हुन नसकेको उनको भनाई थियो । ठकुरीका अनुसार हालसम्म २७०० इ–रिक्सा मात्र उपमहानगरपालिकामा सूचिकृत भएका छन् ।

प्रकाशित मिति: सोमबार, असोज १५, २०८० १८:१५