डुडुवामा अत्याधुनिक ७०० मेट्रिक टनको कोल्ड स्टोर निर्माण शुरु

स्थानीय

गृहपृष्ठ
स्थानीय
डुडुवामा अत्याधुनिक ७०० मेट्रिक टनको कोल्ड स्टोर निर्माण शुरु

डुडुवामा अत्याधुनिक ७०० मेट्रिक टनको कोल्ड स्टोर निर्माण शुरु

बुधबार, मंसिर १५, २०७८ बागेश्वरी पोस्ट

डुडुवा (बाँके) । बाँकेको डुडुवा गाउँपालिकाको सबैभन्दा ठुलो दोस्रो योजनाको रुपमा रहेको कोल्ड स्टोरको निर्माण शुरु भएको छ । डुडुवा ६ हिरिमिनियामा निर्माण थालिएको ७०० मेट्रिक टन क्षमताको अत्याधुनिक कोल्ड स्टोरेजको आज एक कार्यक्रमका बीच पुजापाठ गरी शिलान्यास गरिएको छ ।

भवनको शिलान्यास गर्दै गाउँपालिका अध्यक्ष नरेन्द्रकुमार चौधरीले आलुको पकेट क्षेत्र मानिएको हिरिमिनियाका किसानले उत्पादन गरेको तरकारी तथा फलफुल भण्डारणमा सहयोग पुग्ने बताए । उनले आलु लगायतका तरकारी र फलफुल भण्डारण गर्नका लागि डुडुवाका किसानलाई विशेष फाइदा भएपछि कृषि उत्पादनमा बृद्धि तथा बजारीकरणको सम्भावना अझै बढने बताए । अध्यक्ष चौधरीले गाउँपालिकाको दोस्रो वर्षको योजनामा परेको यो योजनालाई अहिले कार्यान्वयनमा ल्याउँदा किसानका समस्या समाधान हुनेमा विश्वास व्यक्त गरे ।

करिब १३ कठ्ठा जग्गामा निर्माण हुन लागेको अत्याधुनिक प्रविधि मल्टीप्रपोजको लागत रु ६ करोड, ७ लाख ५४ हजार २१२ रहेको छ । कोल्ड स्टोरेजसंगै प्रशासनिक कार्यालय भवन, गेष्ट हाउस, शौचालय, वाउण्ड्री वाल, पार्किङको निमार्ण गरिने गाउँपालिकाका इन्जिनियर प्रकाश शाहीले बताए ।

कोल्ड स्टोरेजको निर्माणपछि गाउँपालिकाका किसानसंगै जिल्लाका अन्य किसानलाई पनि राहत मिल्नेछ । १८ महिनाको अवधिमा निर्माण सम्पन्न गर्ने गरी काठमाण्डांैस्थित पारामाउण्ट नेचुरल जेवी निर्माण कम्पनीले ठेक्का लिएको इन्जिनियर सुरेन्द्र बर्माले बताए । उनका अनुसार ६ महिना लगाएर योजनाको अत्याधुनिक डिपीआर तयार गरिएको हो ।

गाउँपालिकाको पहिलो ठुलो योजना गाउँपालिकाको प्रशासनिक भवन रहेको छ । उक्त भवन अहिले निर्माणाधीन रहेको र हालसम्म करिब ८० प्रतिशत निर्माण सकिएको जनाइएको छ ।

प्रकाशित मिति: बुधबार, मंसिर १५, २०७८ १९:१३

प्रतिक्रिया दिनुहोस्