सुदूरपश्चिम प्रहरीको अनुसन्धान समूह खारेज, होटल मालिकमाथि सोही टोलीद्वारा आक्रमण

सुरक्षा-अपराध

गृहपृष्ठ
सुरक्षा-अपराध
सुदूरपश्चिम प्रहरीको अनुसन्धान समूह खारेज, होटल मालिकमाथि सोही टोलीद्वारा आक्रमण

सुदूरपश्चिम प्रहरीको अनुसन्धान समूह खारेज, होटल मालिकमाथि सोही टोलीद्वारा आक्रमण

शनिबार, असार ३०, २०८० बागेश्वरी पोस्ट

धनगढी । कञ्चनपुरको बेलौरीस्थित एक होटल सञ्चालकलाई प्रहरीको अनुसन्धान समूह ( आरआइटी) मा कार्यरत प्रहरीले आक्रमण गरेको जानकारी आएपछि नेपाल प्रहरीको सुदूरपश्चिम प्रदेश आरआइटी खारेज गरिएको छ ।

सुदूरपश्चिमका डीआईजी भरत बोहराले बेलौरीमा होटल सञ्चालकमाथिको घटनाका कारण आरआइटी खारेज गरेका जनाएका छन् । अनुसन्धान समूह (आरआइटी) मै कार्यरत दुई जना प्रहरीले होटेल सञ्चालकलाई नै आक्रमण गरेको आरोपमा सबैको दरबन्दी फिर्ता गर्दै आरआइटी खारेज गरेको डीआईजी बोहराले जानकारी दिएका छन् ।

आक्रमणको आरोप लागेका सहायक हवलदार दिप पाण्डे र प्रहरी जवान हेमराज भट्टमाथि अनुसन्धान भइरहेको र आरआइटीका प्रमुख वरिष्ठ प्रहरी नायब निरीक्षक केशवराज जोशी सहितका ७ जना प्रहरीलाई सम्बन्धित ठाउँमा रमाना गरेर पठाइसकेको डीआईजी बोहराले बताए ।

कञ्चनपुरको बेलौरीस्थित फेमली रेष्टुरेन्टमा गएर रकम माग्दा नदिएपछी सहायक हवलदार पाण्डे र प्रहरी जवान भट्टले सञ्चालक सुरेशकुमार वडायकमाथि गए राति धारिलो वस्तुले प्रहार गरेको आरोप लागेको छ ।

डीआईजी बोहरालाई आक्रमण गरेको जानकारी दिएपछि आराइटीको औचित्य नभएको भन्दै सबैलाई आफ्नो दरवन्दीमा पठाउँदै सहायक हवलदार पाण्डे र प्रहरी जवान भट्टमाथि अनुसन्धान गर्न आदेश दिएका हुन् ।

प्रदेश प्रहरी कार्यालयले आरआइटी खारेज गर्दै अपराध, अनुसन्धान लगायतका काम सम्बन्धित ठाउँको स्थानीय प्रहरीलाई दिने व्यवस्था मिलाउने आदेश दिएको छ भने अति आवश्यक भएमा पुनः गठन गर्न सकिने जनाएको छ ।

प्रकाशित मिति: शनिबार, असार ३०, २०८०, ०९:११:००

प्रतिक्रिया दिनुहोस्