गेरुवाद्वारा कोभिड प्रतिकार्य परियोजनाको सिकाई आदानप्रदान

समाचार

गृहपृष्ठ
समाचार
गेरुवाद्वारा कोभिड प्रतिकार्य परियोजनाको सिकाई आदानप्रदान

गेरुवाद्वारा कोभिड प्रतिकार्य परियोजनाको सिकाई आदानप्रदान

बुधबार, माघ ७, २०७७ बागेश्वरी पोस्ट

सिकाई आदानप्रदान कार्यशालामा प्रस्तुतिकरण गर्दै गेरुवाका कार्यकारी निर्देशक हरि सुवेदी

बर्दिया । युएसएआइडीको आर्थिक तथा प्राविधिक सहयोगमा राजापुर नगरपालिकाको समन्वय तथा सहकार्य र गेरुवा ग्रामीण जागरण संघद्वारा राजापुरमा सञ्चालित कोभिड १९ प्रतिकार्य परियोजनाको सिकाई आदानप्रदान एवम् परियोजना समापन कार्यक्रम राजापुरमा सम्पन्न गरिएको छ ।

कोभिड १९ को प्रभावमा परेर विदेश र देशका विभिन्न स्थानबाट रोजगारी गुमाएर घर फर्केका तथा आफ्नै स्थानमा आर्थिक अभावका कारण समस्यामा रहेका व्यक्तिहरुलाई लक्षित गरी सञ्चालन गरिएको परियोजनाको सिकाई आदानप्रदान कार्यक्रममा राजापुर नगर प्रमुख शिवप्रसाद चौधरीले छोटो समयमा गेरुवा ग्रामिण जागरण संघले गरेको कार्यको प्रशंसा गर्नुभयो । उहाँले सबै मिलेर कार्य गर्दा छोटो अवधिमा पनि ठूलो काम गर्न सकिने सिकाई भएको बताउनुभयो । राजापुरमा कोभिड १९ को प्रभाव कम गर्न यो कार्यक्रम निकै सहयोगी भएको स्मरण गर्दै सुरु गरिएका पहलहरुलाई दिगोपन दिन पालिकाले निरन्तर अनुगमन गर्ने प्रतिबद्धता पनि जनाउनुभयो ।

कार्यक्रमका विशिष्ट अतिथि राजापुर नगरपालिकाका उपप्रमुख मनकला चौधरीले परियोजना कार्यान्वयनका बेला आफू अनुगमनमा गएको र अनुकरणीय कार्य भएको पाएको बताउनुभयो । गेरुवा ग्रामिण जागरण संघका अध्यक्ष कृष्णजंग शाहको अध्यक्षतामा भएको कार्यक्रममा राजापुर नगरपालिकाका निमित्त प्रमुख प्रशासकीय अधिकृत, वडाअध्यक्षहरु, पालिकाका शाखा प्रमुखहरु, राजापुर उद्योग व्यापार संघ अध्यक्ष, गैससकर्मीहरु र कार्यक्रमका लाभग्राहीहरुको सहभागिता रहेको थियो ।

सम्पन्न परियोजनाले राजापुर नगरपालिकामा हेल्प डेस्क स्थापना, सूचना व्यवस्थापन प्रणाली अद्यावधिक, ११ वटा कामका लागि नगद योजना सम्पन्न गरेर २०३ जनालाई २० दिनको रोजगारी, ३५७ घरलाई सशर्त नगद अनुदान र २६ जनालाई सीपमूलक तालिम दिएको थियो । साथै कामका लागि नगद र सीपमूलक तालिमका सहभागीहरुलाई कार्य गर्ने सामग्रीहरु पनि उपलब्ध गराएको थियो ।

स्थानीय साझेदारको रुपमा परियोजना कार्यान्वयन गर्न यूएसएडतयार नेपालसँग ३२ लाख १३ हजार ४८९ रुपैयाको सम्झौता गरेको गेरुवा ग्रामिण जागरण संघले १ करोड ७२ लाख बढीको काम गरेको थियो भने १ करोड १४ लाख २४ हजार लक्षित लाभग्राहीलाई नै वितरण गरिएको थियो ।

प्रकाशित मिति: बुधबार, माघ ७, २०७७ १२:०३