‘दहाड’ का लागि नवीन अभिलाषीलाई ‘सनत रचना कथा सम्मान-२०८२’

संस्कृति-साहित्य

गृहपृष्ठ
संस्कृति-साहित्य
‘दहाड’ का लागि नवीन अभिलाषीलाई ‘सनत रचना कथा सम्मान-२०८२’

‘दहाड’ का लागि नवीन अभिलाषीलाई ‘सनत रचना कथा सम्मान-२०८२’

मंगलबार, असोज ६, २०८३ बागेश्वरी पोस्ट

नेपालगन्ज । कविता हुँदै कथा लेखनमार्फत नेपाली साहित्यमा हस्तक्षेपकारी उपस्थिति बनाएका कथाकार नवीन अभिलाषी ‘सनत रचना कथा सम्मान २०८२’ बाट सम्मानित भएका छन् । मध्यपश्चिम स्रष्टा समाजले २०८२ सालमा प्रकाशित उनको कथा संग्रह ‘दहाड’ का लागि अभिलाषीलाई उक्त सम्मान प्रदान गरेको हो ।

नेपालगन्जमा आयोजित समारोहमा वरिष्ठ सहित्यकार तथा सम्पादक श्रीओम श्रेष्ठ ‘रोदन’ र सम्मानका संस्थापक तथा वरिष्ठ कथाकार सनत रेग्मीले अभिलाषीलाई नगद ११ हजार १११ रुपैयाँसहित सम्मानपत्र प्रदान गरे ।

गत वर्ष प्रकाशित तथा आह्वान बमोजिम प्राप्त कथा संग्रहहरूमध्ये वरिष्ठ साहित्यकार तथा सम्पादक गोपाल अश्कको संयोजकत्वमा गठित तीन सदस्यीय छनोट समितिले ‘दहाड’लाई उत्कृष्ट कृतिका रूपमा छनोट गरेपछि अभिलाषीलाई सम्मान गरिएको कार्यक्रममा जानकारी गराइएको थियो ।

मध्यपश्चिम स्रष्टा समाजका अध्यक्ष बीपी अस्तुका अनुसार ‘दहाड’मार्फत अभिलाषीले नेपाली समाजको इतिहास र वर्तमानका कटु यथार्थ, बहुआयामिक असमानताबाट सिर्जित विडम्बना तथा सामाजिक संरचनाको पिँधमा रहेका समुदायका अलिखित संघर्षलाई कथामार्फत अभिव्यक्त गरेका छन् । यही योगदानका लागि उनलाई सम्मान गरिएको उनले बताए ।

कथा संग्रह ‘दहाड’माथि समीक्षकीय टिप्पणी राख्दै समीक्षक भागवत पौडेलले संग्रहका कथामा न्यायको मुद्दा केन्द्रमा रहेको र न्याय कसले दिने भन्ने प्रश्न उठाइएको बताए । विभिन्न तहका विभेद र असमानताबाट अन्यायमा परेका मानिसका कथामार्फत कथाकारले समाजसामु महत्वपूर्ण प्रश्नहरू छाडेको उनको भनाइ थियो । ती प्रश्नहरू जीवित रहुञ्जेल ‘दहाड’ सान्दर्भिक रहिरहने उनले बताए ।

सम्मान ग्रहणपछि कथाकार अभिलाषीले समाजमा विभेदका अनेक तह रहेको अनुभूति भएपछि आफू साहित्य अध्ययन र लेखनतर्फ आकर्षित भएको बताए । ‘दहाड’मा आफ्नै समुदायको इतिहासलाई भुइँतहबाट हेर्ने प्रयास गरिएको उनले उल्लेख गरे ।

‘सनत रचना कथा सम्मान’ वरिष्ठ कथाकार रेग्मीले आफू र आफ्नी जीवनसंगिनी रचना रेग्मीको नाममा स्थापना गरेका हुन् । सम्मान हस्तान्तरणको व्यवस्थापन भने मध्यपश्चिम स्रष्टा समाजले गर्दै आएको छ ।

यस सम्मान अन्तर्गत पहिलो वर्ष २०७९ मा कथा संग्रह ‘अँध्यारो बस्तीकी नायिका’ का लागि कथाकार दिला शाह, २०८० सालमा ‘कालो गुलाब’ का लागि कथाकार गोपाल अश्क र २०८१ सालमा ‘बहुरूपी’ का लागि कथाकार श्रेयज सुवेदी सम्मानित भइसकेका छन् ।

नेपाल प्रज्ञा–प्रतिष्ठानका प्राज्ञ परिषद् सदस्य समेत रहेका अभिलाषी कविता विधामा पनि परिचित स्रष्टा हुन् ।

यसैबीच, सोही समारोहमा कथाकार सनत रेग्मीको ८०औँ जन्मदिवस मनाइनुका साथै उनका दुई कृति विमोचन गरिएका थिए । रेग्मीका निबन्धहरूको संग्रह ‘टुक्रा टुक्रा जिन्दगी’ तथा उहाँको साहित्यिक व्यक्तित्वमाथि विभिन्न व्यक्तिले लेखेका लेखहरूको संग्रह ‘सनत रेग्मी शब्दाभिनन्दन’ विमोचन गरिएको हो ।

विमोचित कृति ‘टुक्रा टुक्रा जिन्दगी’बारे डा. हरि तिमिल्सेनाले तथा ‘सनत रेग्मी शब्दाभिनन्दन’बारे साहित्यकार ऋचा लुइँटेलले परिचयात्मक टिप्पणी राखेका थिए ।

मध्यपश्चिम स्रष्टा समाजका अध्यक्ष बीपी अस्तुको अध्यक्षतामा भएको कार्यक्रममा वरिष्ठ साहित्यकार तथा सम्पादक श्रीओम श्रेष्ठ ‘रोदन’, कथाकार नवीन अभिलाषी, उपन्यास समाजका अध्यक्ष शंकर भारती, नेपाली भाषाविद् प्रा.डा. कृष्णप्रसाद घिमिरे, भारतको महाराष्ट्रबाट आएका साहित्यकार मनिषा खटाटे र प्रदीप सारंग, नेपाल प्रज्ञा–प्रतिष्ठानका प्राज्ञ सभा सदस्य किरण आचार्य, लेखक नरेन्द्रजंग पिटर लगायत एक सय भन्दा बढी साहित्यप्रेमीको सहभागिता रहेको थियो ।