नागरिक समाजसँग संवादः निर्वाचन आचारसंहिता पालनामा खवरदारी गर्ने प्रतिवद्धता

आम निर्वाचन-२०७९

गृहपृष्ठ
आम निर्वाचन-२०७९
नागरिक समाजसँग संवादः निर्वाचन आचारसंहिता पालनामा खवरदारी गर्ने प्रतिवद्धता

नागरिक समाजसँग संवादः निर्वाचन आचारसंहिता पालनामा खवरदारी गर्ने प्रतिवद्धता

सोमबार, कात्तिक २१, २०७९ बागेश्वरी पोस्ट

नेपालगञ्ज । नागरिक समाजका अगुवाले निर्वाचन स्वतन्त्र, निष्पक्ष र भयरहित बनाउन आचारसंहिता पालनासँगै आवश्यक खवरदारी गर्ने प्रतिबद्धता व्यक्त गरेका छन् ।

बाँकेस्थित नागरिक समाजको प्रतिनिधित्व गर्ने पेशागत संघ संगठनका प्रमुख, अधिकारकर्मी, चिकित्सक, कानुन व्यवसायी, सञ्चारकर्मी, युवा लगायतको सहभागिता रहेको कार्यक्रममा मंसिर ४ गते हुने प्रतिनिधि तथा प्रदेशसभा निर्वाचन शान्तिपूर्ण बनाउन आचारसंहिता पालना नै प्रमुख दायित्व भएकाले राजनीतिक दल, उम्मेदवार लगायतलाई आचारसंहिता कार्यान्वयनका लागि सचेतसँगै दबाब दिइनु पर्नेमा जोड दिइएको छ । संवाद समूह बाँकेद्वारा आज नेपालगञ्जमा आयोजित निर्वाचन आचारसंहिता कार्यान्वयनमा नागरिक समाजको भूमिका विषयक अन्तरक्रियात्मक संवाद कार्यक्रममा सो प्रतिवद्धता व्यक्त गरिएको हो ।

निर्वाचन आचारसंहिता अनुगमन अधिकृत खडानन्द अधिकारीको विशेष उपस्थिति रहेको कार्यक्रममा चुनावी प्रचार प्रसारको नाममा आचारसंहिता विपरित गाडी, व्यानर, झण्डा र स्टीकरको व्यापक प्रयोग गरिएको भन्दै सहभागी अधिकांशले सचेततासँगै खवरदारीमा पनि जोड दिएका थिए ।

निर्वाचन आचारसंंहिता अनुगमन अधिकृत अधिकारीले निर्वाचनलाई शान्तिपूर्ण र सफल बनाउन नागरिक समाजको अहम् भूमिका रहने भन्दै आवश्यक सूचना दिन र असल नागरिकको जिम्मेवारी वहन गर्न पनि आह्वान गरे । आचारसंहिता उल्लंघन गर्ने जो सुकै किन नहोस्, सचेत गराउनेदेखि कारवाहीको दायरामा ल्याउने सम्मको कार्य गर्न आफूहरु नडग्मगाउने उनले स्पष्ट पारे ।

उच्च अदालत बार एशोसिएशन नेपालगञ्जका अध्यक्ष शिवराज श्रेष्ठले आचारसंहिता उल्लंघनका ससाना घटनातर्फ ध्यान दिन आह्वान गर्दै मतदातालाई प्रभावित पार्ने काम कहीँ कतैबाट गर्न नहुनेमा जोड दिए । चिकित्सक संघ भेरीका सचिव डा. दिनेश चौधरीले निर्वाचन आचारसंहिता पालना गर्नु साझा दायित्व भएकाले सोही अनुसारको समन्वय र सहकार्य हुनुपर्ने आवश्यक्ता औंल्याए ।

च्याम्वर अफ कमर्स, नेपालगञ्जका अध्यक्ष सतिश अग्रवालले आचारसंहिता उल्लंघनकर्तालाई दिइनुपर्ने सजाय सानो भएकाले पनि अटेरी गरिएको हुन सक्ने भन्दै कारवाहीको दायरा बढाउन पनि सुझाव दिए । नेपाल पत्रकार महासंघ बाँकेका पूर्व अध्यक्ष झलक गैरेले सामाजिक सञ्जालमा आउने आचारसंहिता उल्लंघनका सूचनाले वास्तविक मिडिया मारमा परेको भन्दै आयोगका तर्फबाट आवश्यक नियमन र सहज सूचना प्रवाहको बातावरण मिलाइदिन पनि अनुरोध गरे ।

जिल्ला बार बाँके अध्यक्ष जनक बहादुर शाहीले आचारसंहिता पालना गनुपर्नेले नै आचारसंहिता उल्लघंन गर्न उद्यत देखिएको भन्दै पालना भए नभएको नियमन गर्नुपर्नेमा जोड दिए । राष्ट्रिय अपाङ्ग महासंघका प्रतिनिधि टेकराज जैसीले अपांगता भएका, असक्त व्यक्तिहरुका लागि सहज मतदान गर्ने व्यवस्था मिलाइनुपर्ने आवश्यक्ता औल्याए ।

प्रकाशित मिति: सोमबार, कात्तिक २१, २०७९ १९:५४

प्रतिक्रिया दिनुहोस्