अपाङ्गता भएका व्यक्तिलाई मतदाता शिक्षा

आम निर्वाचन-२०७९

गृहपृष्ठ
आम निर्वाचन-२०७९
अपाङ्गता भएका व्यक्तिलाई मतदाता शिक्षा

अपाङ्गता भएका व्यक्तिलाई मतदाता शिक्षा

मंगलबार, कात्तिक २२, २०७९ बागेश्वरी पोस्ट

नेपालगञ्ज । मत खेर नजाओस् भन्ने हेतुले बाँकेमा दृष्टिविहीन अपाङ्गता भएका व्यक्ति आफैं मतदाता शिक्षा कार्यक्रममा परिचालन भएका छन् । निर्वाचनमा सहज पहुँच स्थापित गर्ने र मत खेर नजाओस् भन्ने हेतुले अपाङ्गता भएका व्यक्तिलाई उक्त समुदायकै प्रशिक्षित ब्यक्तिहरुबाट मतदाता शिक्षा दिन थालिएको हो ।

दृष्टिविहीन नरेश थारुको हिजो आजको दैनिकी यसैगरी अपाङ्गता भएका व्यक्तिहरुलाई मत कसरी हाल्ने, आफूले हालेको मत वदर नहोस् भनेर के सावधानी अपनाउने लगायतका कुरा सिकाएर वित्ने गरेको छ । अर्का दृष्टिविहीन श्यामबहादुर थारुको दैनिकी पनि नरेशको जस्तै छ । आसन्न प्रतिनिधिसभा र प्रदेशसभा निर्वाचनमा अपाङ्गता भएका व्यक्तिहरुको मत खेर नजाओस् र मताधिकार सुनिश्चित होस् भन्ने उद्देश्यले मतादाता शिक्षा दिने गरिएको नरेशको भनाई छ ।

निर्वाचनमा सहज पहुँच स्थापित गर्ने र मत खेर नजाओस् भन्ने हेतुले अपाङ्गता भएका व्यक्तिलाई उक्त समुदायकै प्रशिक्षित ब्यक्तिहरुबाट मतदाता शिक्षा दिन थालिएपछि लक्षित वर्ग खुसी पनि भएका छन् । आज मात्रै उनीहरुले नेपालगञ्ज उपमहानगरपालिका २० मनिकापुरस्थित जयजनता माविमा नमुना मतदान कार्यक्रम गरेका थिए । त्यसअघि उनीहरुले मंगलप्रसाद माविमा पनि नमुना मतदान गरेका थिए ।

नेत्रहिन युवा संघ नेपाल बाँकेमा आवद्ध दृष्टिविहीनहरुले अपाङ्गता भएका व्यक्तिहरुलाई ठाउँठाउँमा नमुना मतदान कार्यक्रम गरेर मत हाल्ने तरिका समेत सिकाउने गरेका छन् । तर, निर्वाचन आयोगले मतपत्रमा ब्रेललिपीको व्यवस्थापन गर्न नसक्दा दृष्टिविहीनहरुले अरुकै साहारामा मत हाल्नु पर्ने अवस्था रहेको दृष्टिविहीन रिता खड्काको दुःखेसो छ ।

प्रकाशित मिति: मंगलबार, कात्तिक २२, २०७९ १३:१०