'समानुपातिकमा रुख र प्रत्यक्षमा गठबन्धनलाई मत हाल्नुस्'

आम निर्वाचन-२०७९

गृहपृष्ठ
आम निर्वाचन-२०७९
'समानुपातिकमा रुख र प्रत्यक्षमा गठबन्धनलाई मत हाल्नुस्'

'समानुपातिकमा रुख र प्रत्यक्षमा गठबन्धनलाई मत हाल्नुस्'

मंगलबार, कात्तिक २२, २०७९ बागेश्वरी पोस्ट

नेपालगञ्ज । नेपाली कांग्रेसले गठबन्धनका उम्मेदवारलाई जिताउन निर्देशन दिएको छ । बाँकेको नरैनापुरमा आज आयोजित छलफलमा कांग्रेस नेताहरुले समानुपातिकतर्फ रुख तथा प्रत्यक्षमा गठबन्धनका उम्मेदवारहरुको चुनाव चिन्हमा मतदान गर्न निर्देशन दिएका हुन् ।

जिल्ला सभापति नारायणप्रसाद गौडेलसंगै नरैनापुर पुगेका नेपाली कांग्रेस केन्द्रबाट बाँके क्षेत्र नम्बर १ मा खटाइएका नेपाली काँग्रेसका केन्द्रीय सदस्य मैकुलाल बाल्मिकी र पूर्व आमन्त्रित केन्द्रीय सदस्य तथा प्रचारप्रसार समिति सदस्य महेन्द्र शर्माले गठबन्धनका उम्मेदवारका पक्षमा अझ मजबुत माहोल सिर्जना गर्न आह्वान गरे ।

समानुपातिकमा पार्टीलाई र प्रत्यक्षमा गठबन्धनलाई जिताउन कुनै कसर बाँकी नराखेर अघि बढ्न निर्देशन दिए । प्रत्यक्ष र समानुपातिक उम्मेदवारसंगै पालिका तथा वडास्तरीय नेता कार्यकर्तालाई निर्देशन दिँदै नेताहरुले गठबन्धनको बाध्यतालाई स्विकार्दै सफल बनाउन लाग्नुपर्ने सबैको दायित्व भएको उल्लेख गरे ।

जिल्ला सभापति गौडेलले स्थानीय चुनावको जस्तै अभूतपूर्व सफलता दिलाउन सबैलाई गम्भीर भएर लाग्न आह्वान गरे । छलफल कार्यक्रममा उपसभापति गोपालप्रसाद अधिकारी, क्षेत्रीय सभापति पोषण केसी, प्रबक्ता डिल्ली गिरी लगायतले काँग्रेसका नेता तथा कार्यकर्तालाई समानुपातिकमा रुखमा मतदान गर्न र प्रत्यक्षतर्फ गठबन्धनका उम्मेदवारका पक्षमा मतदान गर्न अपिल गरेका छन् । त्यसक्रममा प्रदेशसभा सदस्य पदकी उम्मेदवार कृृष्णा केसी नमुना, समानुपातिक उम्मेदवार संगिताकुमारी थारु लगायत उपस्थित थिए ।

प्रकाशित मिति: मंगलबार, कात्तिक २२, २०७९ २०:१८