"भावी मन्त्रीलाई रोज्न हामी आतुर छौं" - बागेश्वरी पोस्ट

आम निर्वाचन-२०७९

गृहपृष्ठ
आम निर्वाचन-२०७९
"भावी मन्त्रीलाई रोज्न हामी आतुर छौं"

"भावी मन्त्रीलाई रोज्न हामी आतुर छौं"

'सेफ जोन' मा देखिन्छन् राठोर

मंगलबार, कात्तिक २२, २०७९ बागेश्वरी पोस्ट

नेपालगञ्ज । नेपाल विद्यार्थी संघ (नेविसंघ) को राजनीतिबाट उदाएर नेपाली कांग्रेसको पार्टी जीवनमा स्थापित भएका किशोरसिंह राठोर नेविसंघका पूर्व अध्यक्ष हुन् । विद्यार्थी राजनीतिकालीन समयमा विद्यार्थीहरुको आशा, भरोसा र ढुकढुकी बनेका राठोर आफ्नो हक्की स्वभावले सबै माझ परिचित थिए । विद्यार्थी राजनीतिको शीर्ष तहमा पुगेका राठोर जब पार्टी जीवनमा प्रवेश गरे, आफ्नो मेहनत, लगन, निरन्तरता र निष्ठाले उचाई लिने क्रममै छन् ।

केन्द्रीय सदस्य हुँदै आज उनी पार्टी पदाधिकारी तहमा छन् । १४औं महाधिवेशनबाट खसआर्य क्लष्टरमा लोकप्रिय मतका साथ सहमहामन्त्री चुनिएका राठोर बाँके र बर्दियाका अभिभावक हुन् । लुम्बिनी प्रदेशमा कांग्रेसबाट एक मात्र पदाधिकारी राठोर प्रत्यक्षतर्फ संसदको यात्रा तय गर्ने क्रममा छन् । यसअघि समानुपातिक सांसद रहेका राठोर अब प्रत्यक्षतर्फ सांसद बन्ने अठोटका साथ चुनावी मैदानमा उत्रिएका छन् ।

बाँके र बर्दियालाई भूगोल बनाएर पार्टी राजनीति गरिरहेका उनी यसपटक बाँके क्षेत्र नम्बर ३ बाट गठबन्धनका साझा उम्मेदवार हुन् । नेपालगञ्ज घर भएका राठोर पूर्व पार्टी सभापति एवम् पूर्व प्रधानमन्त्री सुशिल कोइरालाले नेपालगञ्जबाट चुनाव लडिरहकाले बर्दियाको राजापुर क्षेत्रलाई चुनावी क्षेत्र बनाएर राजनीति गरिरहेका थिए । राठोर यसपटक भने बाँके-३ मा आएका छन् । गठबन्धनमा बर्दिया-२ माओवादीलाई परेपछि उनी आफ्नै गृह जिल्लाबाट चुनाव लड्दैछन् ।

"उहाँ बाँकेमै आएर चुनाव लड्नु बाँकेबासीका लागि सुखद कुरा हो, सुशिल दाईपछि अभिभावक पाएका थिएनौं, अब अभिभावक पाएका छौं, हामीले गर्व गर्नुपर्दछ," कांग्रेस नेता कार्यकर्ताहरु भन्छन्, "लुम्बिनीबाट पार्टीमा उहाँ मात्रै पदाधिकारी हो, उहाँले त महत्वपूर्ण मन्त्रालय नै पाउनुहुन्छ, यसमा त बाँकेबासी भाग्यमानी नै छौं ।"

"क्षेत्र नम्बर ३ का जनताले फगत सांसद मात्रै हुनेलाई रोज्लान् कि सम्भावना बोकेको केन्द्रीय नेतालाई रोज्लान्, यो त घामजस्तै छर्लंग छ," एक जना स्थानीयले भने-"भावी मन्त्रीलाई रोज्न हामी आतुर छौं ।" स्थानीय चुनावको अंकगणितलाई नियाल्दा पनि राठोर 'सेफ जोन'मा छन् । कांग्रेस एक्लै अगाडि रहेको यस क्षेत्रमा माओवादीको मत थपिँदा उनी जीत उन्मुख देखिएको नेताहरुको दाबी छ ।

प्रकाशित मिति: मंगलबार, कात्तिक २२, २०७९ २१:२९

प्रतिक्रिया दिनुहोस्