बादशाहलाई स्थानीयले भने-'तपाईंले हार्दा विकास नै रोकियो'

आम निर्वाचन-२०७९

गृहपृष्ठ
आम निर्वाचन-२०७९
बादशाहलाई स्थानीयले भने-'तपाईंले हार्दा विकास नै रोकियो'

बादशाहलाई स्थानीयले भने-'तपाईंले हार्दा विकास नै रोकियो'

शनिबार, कात्तिक २६, २०७९ बागेश्वरी पोस्ट

नेपालगञ्ज । मंसिर ४ गते हुने प्रतिनिधिसभा र प्रदेशसभाको निर्वाचनमा बाँकेको प्रतिनिधिसभा क्षेत्र नम्बर ३ को प्रदेशसभा क्षेत्र नम्बर २ का नेपाली कांग्रेसका उम्मेदवार बादशाह कुर्मी मतदातालाई भेट्न गाउँगाउँमा पुगिरहेका छन् । निर्वाचन सन्निकट रहँदा कुर्मीको व्यस्तता असाध्यै बढेको छ ।

आज साँझ उनी जानकी गाउँपालिकाको वडा नम्बर ५ स्थित बनिया गाउँ पुगे । झिसमिसेमा बनिया गाउँ पुगेको कुर्मी आएका खबर पाउने वित्तिकै गाउँलेहरु भेला भइहाले । एकै छिनमा कार्यक्रम शुरु भयो । कार्यक्रम शुरु हुने वित्तिकै स्थानीयका तर्फबाट आफ्ना कुरा राख्दै एक जना स्थानीयले भनिहाले-"उहाँलाई त हामी पूरापूर सहयोग गर्छौं, उहाँ सांसद (संविधानसभा सदस्य) नै हाम्रो बाटो बनेको हो तर यो भन्दा अघिको चुनावमा उहाँले हारेपछि बाटो उस्तै छ, उहाँले जितेपछि हाम्रो बाटो पक्कै पक्की हुन्छ ।"

मधेशी समुदायको बासोबास रहेको बनिया गाउँका स्थानीयलाई सम्बोधन गर्दै कुमीले आफू जहिले जनताको सुखदुःखमा साथै रहने भएकाले आफूलाई मतदान गर्न आग्रह गरे । उनले प्रतिनिधिसभातर्फ कांग्रेस सहमहामन्त्री किशोरसिंह राठोर तथा समानुपातितर्फ पनि कांग्रेसलाई मत दिन आग्रह गरे । सबै जातजाती, भाषा, लिंग र समुदायको प्रतिनिधित्व गर्ने पार्टी कांग्रेस भएको भन्दै उनले आफ्ना हक अधिकार रक्षाका निम्ति पनि कांग्रेसले जित्न जरुरी रहेको बताए । विकास र समृद्धिका लागि रुख चिन्हमा मतदान गर्न उनले आग्रह गरे ।

नेपाली कांग्रेस बाँकेका उपसभापति गोपालप्रसाद अधिकारीले पछिल्लो पाँच बर्ष कांग्रेसले हार्दा विकास नै अवरुद्ध भएको बताउँदै कांग्रेसका उम्मेदवारहरुलाई जिताउने बेला आएको भन्दै रुखमा मतदान गर्न आग्रह गरे । निवर्तमान सभापति किरण कोइरालाले कांग्रेसका उम्मेदवारहरुको जीतले नै विकास, समृद्धि र स्थिरता सुनिश्चित हुने भन्दै कांग्रेसका पक्षमा मत जाहेर गर्न आग्रह गरिन् । कार्यक्रममा जिल्ला सचिव सुधांशु कोइराला, जिल्ला सदस्यद्वय उमा थापा मगर, रामचन्द्र गुप्ता लगायत उपस्थित थिए ।

प्रकाशित मिति: शनिबार, कात्तिक २६, २०७९ २१:२८