मतदाताको एकएक मतसँग गाँसिएको सपना पूरा गर्नेछौंः इश्तियाक राई

आम निर्वाचन-२०७९

गृहपृष्ठ
आम निर्वाचन-२०७९
मतदाताको एकएक मतसँग गाँसिएको सपना पूरा गर्नेछौंः इश्तियाक राई

मतदाताको एकएक मतसँग गाँसिएको सपना पूरा गर्नेछौंः इश्तियाक राई

सोमबार, कात्तिक २८, २०७९ बागेश्वरी पोस्ट

नेपालगञ्ज । मतदाता तथा सामाजिक अगुवाहरूसँगको भेटघाटलाई तीव्रता दिइरहेका जनता समाजवादी पार्टी बाँके क्षेत्र नं २ का उम्मेदवार मोहमम्द इश्तियाक राईले आफ्नो मत खेर नफाल्न अपिल गरेका छन् ।

प्रतिष्पर्धीहरुले फैलाएका झुटा र अफवाहहरूको पछि नलागेर काम गरिरहेका उम्मेदवारको मूल्याङ्कन गर्न पनि उनले अनुरोध गरे । भेटघाटका क्रममा भएका विभिन्न कोणसभाहरूलाई सम्बोधन गर्दै राईले फेरि पनि यस क्षेत्रमा समग्र विकासको लहर ल्याउनका लागि जसपाका उम्मेदवारहरूलाई मत दिन अपिल गरेका थिए ।

‘तपाईं हामी सबैको एक एक मतको महत्व छ । यो क्षेत्रको विकासका लागि हाम्रा सबै मत अमूल्य छन् । त्यसैका आधारमा यहाँको विकासको मार्गचित्र तयार हुनेछ’ उनले मतदाताहरूलाई सम्झाउँदै भने ‘यो महत्वपूर्ण घडीमा एक मत मात्रै पनि खेर गयो भने विकासका ढोकाहरू बन्द हुनेछन् र झुटा आश्वासनहरू कहिल्यै पूरा हुने छैनन् ।’ राईले समाजमा विग्रह ल्याउन र सामाजिक सद्भाव खलब्ल्याउनका लागि अहिले प्रतिष्पर्धी उम्मेदवारहरूले धर्म र सम्प्रदायका मुद्दाहरू चर्काइरहेको आरोप पनि लगाए ।

‘यस्ता मुद्दाले हाम्रो प्रगति हुँदैन । हामी फेरि उही युगमा फर्किने कि विकासको नयाँ युगमा आफ्ना पुस्तालाई डोर्‍याउने ? यो गम्भीर प्रश्न हो र त्यसको फैसला हाम्रा एक एक मतहरूले गर्नेछन्’ उनले भने ‘अब धर्म, जाति र सम्प्रदायका कुरा गरेर जनता वेवकुफ बनाउने समय छैन । हरेक मतदाता सचेत हुनुहुन्छ र आफ्नो मतको मूल्य सबैलाई थाहा छ ।’ आफूविरूद्ध छरिएका भ्रम र लगाइएका आरोपहरूलाई प्रमाणित गर्न चुनौती दिँदै उनले दोषी ठहरिए जनताले गरेको फैसला र सजाय भोग्न तयार रहेको पनि बताए ।

प्रकाशित मिति: सोमबार, कात्तिक २८, २०७९ २०:२६