उत्साहका साथ मतदानमा सहभागी हुन नरैनापुर गाउँपालिका अध्यक्ष शाहको अपील

आम निर्वाचन-२०७९

गृहपृष्ठ
आम निर्वाचन-२०७९
उत्साहका साथ मतदानमा सहभागी हुन नरैनापुर गाउँपालिका अध्यक्ष शाहको अपील

उत्साहका साथ मतदानमा सहभागी हुन नरैनापुर गाउँपालिका अध्यक्ष शाहको अपील

निर्वाचनको सम्पूर्ण तयारी पूरा

शनिबार, मंसिर ३, २०७९ बागेश्वरी पोस्ट

नरैनापुर (बाँके) । भोलि हुने प्रतिनिधिसभा तथा प्रदेशसभा सदस्य निर्वाचनका लागि बाँकेको नरैनापुरमा सम्पूर्ण तयारी पूरा गरी मतदानस्थलमा कर्मचारी तथा सुरक्षाकर्मी तैनाथ भएका छन् ।

नरैनापुर गाउँपालिका अध्यक्ष इस्तियाक अहमद शाहले नरैनापुरमा निर्वाचनको सम्पूर्ण तयारी पूरा भएकाले कुनै पनि डर, त्रासमा नपरी निर्धक्क भएर मतदानमा सहभागी हुन आममतदातालाई आह्वान गरेका छन् ।

गाउँपालिकामा रहेका १२ वटा मतदान केन्द्रमा निर्वाचनका लागि कर्मचारी तथा सुरक्षाकर्मी पुगिसकेको बताउँदै उनले मतदानस्थल तयार पार्ने काम सम्पन्न गरेको बताए । अध्यक्ष शाहले भने-‘गृह प्रशासनले शान्ति सुरक्षाको पूर्णरूपमा सुनिश्चितता गरेको छ, नरैनापुरमा भयरहित वातावरणमा मतदान गर्ने व्यवस्था गरिएको छ, त्यसका लागि आवश्यक तयारी पूरा भएको छ, निर्धक्क भएर मतदानमा सहभागी हुन आममतदातालाई आह्वान गर्दछु ।’

अध्यक्ष शाहले भने-“निर्वाचनलाई स्वच्छ, निष्पक्ष एवम् मर्यादित बनाउन निर्वाचन आयोगले आफ्नो तर्फबाट सबै उपाय अपनाएको छ भने स्थानीय सरकारले पनि निर्वाचनलाई स्वच्छ, निष्पक्ष, भयरहित र मर्र्यादित बनाउन लागि परेको छ, त्यसैले आममतदातालाई ढुक्क भएर मतदानमा सहभागी हुन अनुरोध गर्दछु ।”

अध्यक्ष शाहले, निर्वाचनमा सहभागी सबै प्रशासक, कर्मचारी, शिक्षक, सुरक्षाकर्मी एवम स्वयंमसेवीलाई जिम्मेवार र संयमतापूर्वक कर्तव्य निर्वाह गर्न पनि अनुरोध गरेका छन् । संविधान कार्यान्वयनको मुख्य कडीको रुपमा लिइएको यो चुनावलाई संविधान लागू गर्ने अस्त्रका रुपमा बुझ्न समेत अध्यक्ष शाहले सबैलाई अपील गरेका छन् । निर्वाचनमा निर्वाधरुपले सहभागी भई नमुना निर्वाचन गराउने कार्यमा सहयोग गर्न समेत अध्यक्ष शाहले आग्रह गरेका छन् ।

प्रकाशित मिति: शनिबार, मंसिर ३, २०७९ ०९:५०