हत्या अभियोग लागेका सांसद कोइरीलाई पक्राउ गर्न ७७ वटै 'जिप्रका'मा सर्कुलर जारी

सुरक्षा-अपराध

गृहपृष्ठ
सुरक्षा-अपराध
हत्या अभियोग लागेका सांसद कोइरीलाई पक्राउ गर्न ७७ वटै 'जिप्रका'मा सर्कुलर जारी

हत्या अभियोग लागेका सांसद कोइरीलाई पक्राउ गर्न ७७ वटै 'जिप्रका'मा सर्कुलर जारी

आइतबार, माघ ८, २०७९ बागेश्वरी पोस्ट

नेपालगन्ज । हत्या अभियोगमा मुछिएका एक जना प्रतिनिधिसभा सदस्यलाई पक्राउ गर्म देशभरका प्रहरी कार्यालयमा सर्कुलर जारी भएको छ । महोत्तरी–१ नेकपा एमालेबाट प्रतिनिधिसभा सदस्यमा निर्वाचित भएका लक्ष्मी महतो कोइरीलाई पक्राउ गर्न चौतर्फी दबाब बढेपछि प्रहरी प्रधान कार्यालयले देशभरका जिल्ला प्रहरी कार्यालयलाई सर्कुलर जारी गरेको हो ।

हत्या अभियोगमा मुछिएका प्रतिनिधिसभा सदस्य महतोलाई पक्राउ गर्न सबै जिल्ला प्रहरी कार्यालयलाई निर्देशन दिइसकेको नेपाल प्रहरीका प्रवक्ता डिआइजी टेकप्रसाद राईले जानकारी दिएका छन् ।

मधेस आन्दोलनका क्रममा असई थमन विकको हत्यामा संलग्न रहेको आरोप सांसद कोइरीमाथि छ । २०७२ भदौ २५ गते विकको हत्या भएको थियो।महोत्तरीको जलेश्वरमा आन्दोलनकारीको कुटाइबाट गम्भीर घाइते भएका विकलाई उपचारका लागि जनकपुर लैजाने क्रममा बाटोमा एम्बुलेन्सबाट थुतेर हत्या गरिएको थियो । उनी विक हत्याको योजनाकार रहेको आरोप छ ।

उच्च अदालत जनकपुरले महतोलाई मुद्दाको किनारा नलागेसम्म पुर्पक्षका लागि थुनामा राख्न जिल्ला प्रहरी कार्यालय महोत्तरीलाई आदेश दिएको थियो ।

जिल्ला अदालत महोत्तरीले २०७६ असोज २ मा महतोलाई १ लाख रूपैयाँ धरौटीमा छाड्न आदेश दिएको थियो । तर, उच्च अदालत जनकपुरले त्यो आदेश उल्ट्याउँदै २०७७ मंसिर १९ मा महतोलाई थुनामा राखेर मुद्दा अघि बढाउन आदेश दिएको थियो ।

गृह मन्त्रालयबाट लिखित र मौखिक निर्देशन आएको प्रवक्ता राईले बताए । सांसद कोइरीलाई नियन्त्रणमा लिन प्रहरी लागिराखेको बताउँदै राईले उनी छिट्टै समातिने प्रवक्ता राईले बताए ।

गृहमन्त्रीले दिएको निर्देशनका बाबजुद कोइरी पक्राउ नभएर चौतर्फी आलोचना हुन थालेपछि ६ माघमा गृह मन्त्रालयले विज्ञप्ति नै निकालेर मन्त्रालयको गम्भीर ध्यानाकर्षण भएको भन्दै असन्तुष्टि जनाएको थियो । प्रहरीको निगरानी बढेपछि सांसद कोइरी भारततिर लागेको आशंका गरिएको छ ।

प्रकाशित मिति: आइतबार, माघ ८, २०७९ १७:२०

प्रतिक्रिया दिनुहोस्