निर्वाचन आयोगले दिएन रेशम चौधरीलाई अध्यक्षको मान्यता

राजनीति

गृहपृष्ठ
राजनीति
निर्वाचन आयोगले दिएन रेशम चौधरीलाई अध्यक्षको मान्यता

निर्वाचन आयोगले दिएन रेशम चौधरीलाई अध्यक्षको मान्यता

बिहीबार, फागुन २४, २०८० बागेश्वरी पोस्ट

काठमाडौं । रेशमलाल चौधरीलाई निर्वाचन आयोगले नागरिक उन्मुक्ति पार्टी (नाउपा) को अध्यक्ष मान्न अस्विकार गरेको छ । आयोग आज नाउपाको अध्यक्षमा रेशम चौधरीको नाम अद्यावधिक गर्न अस्विकार गरेको हो ।

गत २७ पुसमा चौधरीलाई कैलालीमा भएको महाधिवेशनले सर्वसम्मत नाउपाको अध्यक्ष चयन गरेको थियो । अध्यक्ष चयन भएपछि नाउपाले दलको अभिलेख अद्यावधिक गरिदिन निर्वाचन आयोगमा २९ माघमा निवेदन दर्ता गराएको थियो ।

आज आयोगले नाउपाले दिएको निवेदनमाथि निर्णय दिँदै चौधरीलाई अध्यक्ष मान्न अस्वीकार गरेको हो । राजनीतिक दलसम्बन्धी ऐनको व्यवस्था अनुसार नाउपाको निर्वाचन आयोगमा यसअघि रहेको अभिलेख अद्यावधिक हुन नसक्ने आयोगले निर्णय भएको छ । रञ्जिता श्रेष्ठ चौधरी नै आयोगमा भएको अभिलेखमा नाउपाको अध्यक्षमा रहेकी छन् ।

चौधरीले निर्वाचन आयोगमा दलको अभिलेख अद्यावधिक गर्न दिएको निवेदनविरुद्ध दुई वटा उजुरी समेत परेका थिए । त्यसमा चौधरी ज्यान मुद्दामा दोषी ठहर भई राष्ट्रपतिबाट कैद छुट पाएका व्यक्ति हुनाले दलको अध्यक्ष बन्नु कानुन विपरीत भएको उल्लेख थियो । उजुरी परेपछि आयोगले नाउपा र अध्यक्ष चौधरीसँग जवाफ मागेको थियो ।

चौधरीले आयोगमा उक्त विषयमा जवाफ पठाएपछि आज दलको अभिलेख अद्यावधिक गर्न नसक्ने निर्णय गरेको प्रवक्ता शालिकराम पौडेलले जानकारी बताए ।

चौधरीले २०६२ भदौ ७ मा टीकापुरमा एसएसपीसहित ७ सुरक्षाकर्मी र एक नाबालकको ज्यान गएको हिंसात्मक झडपमा जन्मकैदको सजाय पाएका उनी गत १५ जेठमा गणतन्त्र दिवसका अवसरमा राष्ट्रपतिबाट कैद मिनाहा पाएर रिहा भएका थिए । उनी रिहा भएपछि चौतर्फी आलोचना समेत भएको थियो ।