दाङको सडकमा लागू भयो 'टाइम कार्ड'

सुरक्षा-अपराध

गृहपृष्ठ
सुरक्षा-अपराध
दाङको सडकमा लागू भयो 'टाइम कार्ड'

दाङको सडकमा लागू भयो 'टाइम कार्ड'

बिहीबार, पुस १८, २०८१ बागेश्वरी पोस्ट

दाङ । दाङस्थित लमही-भालुवाङ सडक खण्डमा सवारी दुर्घटना बढ्दै जाँदा टाइम कार्ड लागू गरिएको छ । पछिल्लो समयमा त्यस सडक खण्डमा अत्यधिक दुर्घटना बढ्न थालेपछि टाइम कार्ड लागू गरिएको जिल्ला प्रहरी दाङका प्रहरी प्रमुख एसपी अर्जुन प्रसाद तिमिल्सिनाले जानकारी दिएका छन् ।

त्यस स्थानमा दैनिक जसो दुर्घटना भएर दिनहुँ मानिसको मृत्यु हुने र घाइते हुने क्रम बढेपछि दुर्घटना न्यूनीकरणका लागि जिल्ला सुरक्षा समिति दाङको निर्णय अनुसार लमही-भालुवाङ सडक खण्डभित्र पर्ने नर्तीदेखि भालुवाङसम्म पुस १५ गतेदेखि टाइम कार्ड लागू गरिएको हो ।

पुस १५ गतेदेखि लागू गरिएको टाइम कार्ड आगामी ३ महिनासम्मका लागि परीक्षणका रुपमा हेरिने एसपी तिमिल्सिनाले जानकारी दिए । एसपी तिमिल्सिनाले भने-"त्यहाँको बाटो पनि साँघुरो र दैनिकरुपमा ज्यानै जाने दुर्घटना भएर आजित भएका स्थानीयहरु टाइम कार्ड लागू हुँदा राहतको अनुभुति गरिरहेका छन् ।"

४ दिनअघि टाइम कार्ड लागू गरिएपछि त्यस दिनदेखि हालसम्म एउटा पनि दुर्घटना नभएको एसपी तिमिल्सिनाले बताए ।

दाङ प्रहरीका अनुसार हाललाई दैनिक रुपमा बेलुका ४ बजेदेखि ८ बजेसम्म परीक्षणका लागि त्यस सडक खण्डमा टाइम कार्ड लागू गरिएको छ । तिमिल्सिनाका अनुसार १५ किलोमिटर दुरीमा रहेको नर्तीदेखि भालुवाङ पुग्न २५ मिनेटको समय लागू गरिएको छ ।

त्यस स्थानमा पैदलयात्री पनि बढी हिँड्ने, बाटो अप्ठ्यारो र साँघुरो रहेको अवस्थामा टाइम कार्ड लागूले दुर्घटनाको झन्झट टर्दै गएको त्यहाँका जनप्रतिनिधिहरु पनि बताउँछन् । हाल पूर्वतर्फबाट आउने सवारीसाधनलाई भालुवाङबाट र पश्चिमतर्फबाट आउने सवारीसाधनलाई नर्तीमा खटाइएको प्रहरी र ट्राफिक प्रहरीको टोलीले टाइम कार्ड जारी गर्दै आएका छन् ।

प्रकाशित मिति: बिहीबार, पुस १८, २०८१ १०:२१

प्रतिक्रिया दिनुहोस्