राप्तीसोनारीमा माघ मिलन कार्यक्रम हुँदै

संस्कृति-साहित्य

गृहपृष्ठ
संस्कृति-साहित्य
राप्तीसोनारीमा माघ मिलन कार्यक्रम हुँदै

राप्तीसोनारीमा माघ मिलन कार्यक्रम हुँदै

आइतबार, पुस २१, २०८१ बागेश्वरी पोस्ट

नेपालगञ्ज । थारु भाषा, संस्कृति, लोक कला र मौलिक हक अधिकारको जगेर्ना गर्ने उद्देश्यका साथ राप्तीसोनारीमा यही पुष २७ गते माघ मिलन कार्यक्रम हुने भएको छ । थारु समुदायको महान पर्व माघीको अवसरमा राप्तीसोनारी-४ मा माघ मिलन कार्यक्रम हुने भएको हो । थारु कल्याणकारिणी सभा बाँकेको आयोजनामा हुने माघ मिलन कार्यक्रममा राष्ट्रिय तथा स्थानीय कलाकारहरुको बेजोड प्रस्तुति रहने आयोजकले जनाएको छ ।

माघ मिलन कार्यक्रममा १५ बढी गाउँका विभिन्न खालका थारु संस्कृति झल्कने मघौटा, हुरदुङ्ग्वा, छोक्रा, डफ, लठ्ठहवा, झुम्रा लगायतका नृत्य प्रस्तुत हुने थारु कल्याणकारिणी सभा बाँकेका अध्यक्ष संगिता थारुले बताइन् । कार्यक्रममा थारु परिकारहरु ढिक्री, घोघी, खुर्सानीको चटनी, बंगुरको मासु, जाँडको स्वाद समेत लिन सकिने अध्यक्ष थारुले जानकारी दिइन् ।

माघ मिलन कार्यक्रममा राष्ट्रिय तथा स्थानीय थारु कलाकारहरुको प्रस्तुति समेत रहनेछ । गायक खेम भौगोरिया, गायिका श्रीदेवी थारु, गायिका सञ्जिता सुन कुशुम्या लगायत स्थानीय कलाकारहरुको प्रस्तुति रहने आयोजकले जनाएको छ । कार्यक्रमको उद्घाटन लुम्बिनी प्रदेश सांसद दुर्गा प्रसाद चौधरीले गर्ने बताइएको छ ।

माघ मिलन कार्यक्रममा थारु समुदायमा योगदान पु¥याएका विभिन्न राजनीतिक दलका नेता कार्यकर्ता, बुद्धिजिवी, शिक्षक, पत्रकार, खेलाडी, कर्मचारी लगायतलाई सम्मान समेत गर्ने अध्यक्ष थारुले बताइन् ।

प्रकाशित मिति: आइतबार, पुस २१, २०८१ १९:३९