'नेपालगन्जका सडक पेटीमा सवारीसाधन पार्किङ गरे परिएला ट्राफिक प्रहरीको फन्दामा'

सुरक्षा-अपराध

गृहपृष्ठ
सुरक्षा-अपराध
'नेपालगन्जका सडक पेटीमा सवारीसाधन पार्किङ गरे परिएला ट्राफिक प्रहरीको फन्दामा'

'नेपालगन्जका सडक पेटीमा सवारीसाधन पार्किङ गरे परिएला ट्राफिक प्रहरीको फन्दामा'

बुधबार, पुस २४, २०८१ बागेश्वरी पोस्ट

बाँके । जिल्ला ट्राफिक प्रहरी कार्यालय बाँकेले सडक दुर्घटना न्यूनीकरणका लागि गरेका पछिल्ला गतिविधि एवं प्रयास उपलब्धमूलक देखिएका छन् ।

पुस १ गतेदेखि बाँके ट्राफिक प्रहरीले चालेका जनचेतना अभिवृद्धि लगायत कार्यक्रम दुर्घटना न्यूनीकरणमा प्रभावकारी बन्दै गएको पाइएको हो । जिल्ला ट्राफिक कार्यालय बाँकेका प्रमुख प्रहरी निरीक्षक पुष्कर पन्तका अनुसार विशेषगरी बाँके ट्राफिक प्रहरीले चालक सहचालकलाई जनचेतनामूलक कक्षा सञ्चालन र सडकमा हिँड्ने पैदलयात्री सर्वसाधारणलाई ट्राफिक सचेतना तथा सडक सुरक्षा कार्यक्रम व्यापक रुपमा गर्दै आएको छ ।

दुर्घटना न्यूनीकरणमा विशेष गरी सवारी चलाउने विरुद्ध अभियान, मापसे जानकारी, ओभरटेकसम्बन्धि गरिएका सचेतना कार्यक्रममा समावेश भएका ट्राफिक गतिविधिमार्फत पुस १ गतेदेखि पुस २३ गतेसम्म ४७ सय ८३ जना प्रत्यक्ष रुपमा लाभान्वित भएका छन् ।

अघिल्ला महिनाको तथ्याङ्क केलाउने हो भने वर्तमान समयमा सवारी दुर्घटनाको सङ्ख्यामा कमी आएको ट्राफिक प्रमुख पन्तले बताए । हाल सवारी चालक, सहचालक, साइकल यात्री, पैदलयात्री, विद्यार्थी लगायत टोलटोलका स्थानीयहरुलाई ट्राफिक जनचेतनामूलक कक्षा दिइरहेको हुँदा दुर्घटनामा पनि कमी आएको देखिएको पन्तले भने ।

बाँके जिल्लाभरमा ट्राफिक प्रहरीको सक्रियता, जनचेतनामूलक कार्यक्रम र नियमको कडाईका साथ पालना गराउँदा राम्रो प्रतिफल मिलेको समेत देखिएको छ । यस्तो खाले सुधारलाई अझ प्रभावकारी बनाउन ट्राफिक प्रहरी कटिबद्ध रहेको र सर्वसाधारणहरुले पनि ट्राफिक नियमको पालना गरी सहयोग गर्नुपर्ने बाँके ट्राफिक प्रमुख पन्तले बताए ।

बाँकेमा यस महिनामा मात्रै ट्राफिक प्रहरीले बाँकेले ७ सय ७८ जना विद्यार्थीहरुलाई ३९ पटक ट्राफिक नियम सम्बन्धि जनचेतनामूलक कक्षा दिएको छ भने १ पटक सामुदायिक सेवामार्फत दिइएको जनचेतनामूलक कार्यक्रममा ११४ जना सहभागी भएको जिल्ला ट्राफिक प्रहरी बाँकेले जानकारी दिएको छ ।

त्यसैगरी, नयाँ सवारी चालकहरुलाई ४ पटक दिइएको ट्राफिक नियमको जनचेतनामूलक कक्षामा २ सय १० लाभान्वित भएको र ३८ पटक व्यवसायिक चालकहरुलाई दिएको ट्राफिक नियम सम्बन्धि जनचेतनामूलक कक्षामा ९ सय ८६ जना सहभागी भएका छन् ।

ट्राफिक प्रहरीले सर्वसाधारणहरुलाई ४० पटक दिएको जनचेतनामूलक कक्षामा १ हजार १६९ जना लाभान्वित भएका छन् । त्यस्तै ३० पटक चालक-यात्रुलाई दिइएको ट्राफिक नियम सम्बन्धि जनचेतनामूलक कक्षामा ९ सय ७६ जना सहभागी भएको जिल्ला ट्राफिक प्रहरी बाँकेले जनाएको छ ।

बाँके ट्राफिक प्रहरीका अनुसार ट्राफिक जनचेतनातर्फ पर्चा पम्प्लेटको ७ पटकमा ५ सय जना लाभान्वित रहँदा ट्राफिक नियम तथा आरक्षण सिटको बारेमा जानकारी र आरक्षण सिट नभएका सवारीसाधनलाई आरक्षण सिटतर्फ २ पटक गरिएको सचेतनामा ५० जना लाभान्वित भएका छन् । त्यस्ता सवारीसाधनलाई आरक्षण सिटको व्यवस्था गर्न जानकारी गराइएको हो ।

बाँके ट्राफिक प्रहरी, नेपालगन्ज उपमहानगरपालिका र जिल्ला प्रहरी बाँकेको संयुक्त टोलीको प्रयासबाट उपमहानगरभित्र रहेका सडकपेटीमा राखिएका ९७ वटा सवारीसाधनलाई कारबाही गरेको जिल्ला ट्राफिक प्रहरी बाँके प्रमुख पन्तले बताए ।

प्रकाशित मिति: बुधबार, पुस २४, २०८१ ११:३०