डुडुवामा रहेको अर्कैको जग्गाको नक्कली धनी बनेर करोडौं कर्जा लिएको आरोपमा ३ जना पक्राउ

सुरक्षा-अपराध

गृहपृष्ठ
सुरक्षा-अपराध
डुडुवामा रहेको अर्कैको जग्गाको नक्कली धनी बनेर करोडौं कर्जा लिएको आरोपमा ३ जना पक्राउ

डुडुवामा रहेको अर्कैको जग्गाको नक्कली धनी बनेर करोडौं कर्जा लिएको आरोपमा ३ जना पक्राउ

बिहीबार, माघ १०, २०८१ बागेश्वरी पोस्ट

नेपालगञ्ज । नक्कली जग्गा धनी बनेर बैंकमा धितो राख्दै करोडौं रुपैयाँ कर्जा लिएको आरोपमा तीन जनालाई प्रहरीले पक्राउ गरेको छ ।

नक्कली जग्गा धनी बनेर पक्राउ परेकाहरुमा काभ्रेस्थित बनेपा नगरपालिका १ का २२ वर्षीय गौरव कार्की, काभ्रेकै बनेपा नगरपालिका १ की ३५ वर्षीया इश्वरी माया रोका र बाराको जितपुर नगरपालिका ३ का ३५ वर्षीय दिलिप कुमार सिंह रहेको जिल्ला प्रहरी कार्यालय बाँकेले जानकारी दिएको छ ।

जिल्ला प्रहरी कार्यालय बाँकेका अनुसार जुम्लाको चन्दननाथ नगरपालिका ८ की रेशमा श्रेष्ठको नाममा बाँकेको डुडुवा गाउँपालिका ५ मा दर्ता रहेको कि.नं. ९५१ र कि.नं. ९५२, क्षेत्रफल ११,०६०.३८ बर्गमिटर (३३ कठ्ठा) जग्गाको नक्कली जग्गा धनी बनेर उनीहरुले जग्गाको लालपूर्जा बनाएर मुक्तिनाथ बिकास बैंकबाट १ करोड २० लाख रुपैयाँ कर्जा लिएको आरोपमा उनीहरुलाई पक्राउ गरिएको हो ।

उनीहरु तीनै जनाले ठगी गर्दै बैंकबाट करोडौं रकम ल्याएको निवेदन परे पश्चात जिल्ला प्रहरी कार्यालय बाँकेले जिल्ला प्रहरी परिसर काठमाडौंलाई गौरव, इश्वरी र दिलिपलाई पक्राउ गर्न पत्राचार गरेको थियो ।

काठमाडौं प्रहरीले खोजतलास गर्ने क्रममा उनीहरु तीन जनालाई माघ ८ गते काठमाडौंको बुद्धनगर र कोटेश्वरबाट पक्राउ गरेको जिल्ला प्रहरी बाँकेले जानकारी दिएको छ ।

करोडौं रुपैयाँ ठगी गरेर पक्राउ परेका उनीहरुलाई जिल्ला प्रहरी परिसर काठमाडौंले आज जिल्ला प्रहरी कार्यालय बाँकेलाई हस्तान्तरण गरेको हो ।