नेपालगञ्जमा रैथाने कथा र आख्यानमाथि चर्चा

संस्कृति-साहित्य

गृहपृष्ठ
संस्कृति-साहित्य
नेपालगञ्जमा रैथाने कथा र आख्यानमाथि चर्चा

नेपालगञ्जमा रैथाने कथा र आख्यानमाथि चर्चा

शनिबार, माघ १९, २०८१ बागेश्वरी पोस्ट

नेपालगञ्ज । रैथाने कथा र बाँकेको समग्र आख्यानबारे आज नेपालगञ्जमा व्यापक चर्चा गरिएको छ । नेपाल प्रज्ञा प्रतिष्ठान साहित्य विभागको आयोजना र सिर्जना कला साहित्य प्रतिष्ठान नेपालगञ्ज बाँकेको संयोजनमा आज नेपालगञ्जमा आयोजित 'बाँके आख्यान महोत्सव' मा आख्यानका विविध पाटोमा समिक्षात्मक चर्चा गरिएको हो ।

साहित्यकारहरु सनत रेग्मी, किरण आचार्य, बिष्णु कमाल, शेखर दहितसँग लेखक तथा पत्रकार शुक्रऋषि चौलागाईले रैथाने कथाका विविध पाटोमा रहेर सहजीकरण गरे । रैथाने समुदायमा कैयौं इस्युहरु भए पनि सशक्त र प्रभावकारी रैथाने कथा किन लेखिएनन्, रैथाने समुदायबाटै कथाकार कसरी उत्पादन गर्ने लगायतका सवाल जवाफसंगै अन्तरक्रिया गरियो ।

बाँके जिल्लाका निबन्ध, निबन्धकार र लेखनीमा साहित्यकार पुष्कर रिजालले प्रवचन दिए भने समग्र आख्यानको अवस्था, सुधार गर्नुपर्ने पक्ष लगायतमा ईश्वरी प्रसाद रिजालले प्रवचन दिए । कस्तो कथा लेख्ने बहसमा सनत रेग्मी, धन प्रसाद सुवेदी र अमर न्यौपानेसँग सहजकर्ता सुमित्रा न्यौपानेले सहजीकरण गरिन् ।

No photo description available.

यस अघि महोत्सवको उद्घाटन गर्दै नेपाल प्रज्ञा प्रतिष्ठानका सदस्य सचिव धन प्रसाद सुवेदीले स्थानीय आख्यान लेखन सशक्त र प्रभावकारी बनाउन साहित्यिक संस्थाहरु पनि संगठित हुनुपर्ने आवश्यकतामा जोड दिए । नेपाल प्रज्ञा प्रतिष्ठान गद्य विभाग प्रमुख अमर न्यौपानेको सभा अध्यक्षतामा भएको कार्यक्रममा प्राज्ञ महानन्द ढकाल र खजुरा प्रज्ञा प्रतिष्ठानका उपकुलपति डा. इन्द्र भण्डारीले पनि आख्यान लेखन गुणस्तरीय बनाउन स्रष्टा स्वयं जागृत हुनुका साथै कार्यशाला लगायतका कार्यक्रम र अभियान गर्नुपर्नेमा पनि जोड दिए ।

स्रष्टा जित बहादुर शाहद्वारा सञ्चालन गरिएको कार्यक्रमको स्वागत मन्तव्य सिर्जना कला साहित्य प्रतिष्ठान नेपालगञ्जका अध्यक्ष शसिराम कार्कीले गरेका थिए । कार्यक्रममा जिल्लाका विशिष्ट साहित्यिक स्रष्टाहरुको सहभागिता रहेको थियो ।

प्रकाशित मिति: शनिबार, माघ १९, २०८१ २०:१२