बाँकेबाट सशस्त्र प्रहरीद्वारा पौने २ करोड बढीको अवैध सामग्री बरामद

सुरक्षा-अपराध

गृहपृष्ठ
सुरक्षा-अपराध
बाँकेबाट सशस्त्र प्रहरीद्वारा पौने २ करोड बढीको अवैध सामग्री बरामद

बाँकेबाट सशस्त्र प्रहरीद्वारा पौने २ करोड बढीको अवैध सामग्री बरामद

मंगलबार, चैत १९, २०८१ बागेश्वरी पोस्ट

नेपालगन्ज । डीआइजी प्रदीप कुमार पालको कमाण्ड रहेको सशस्त्र प्रहरीले लुम्बिनी प्रदेशभरबाट डेढ महिनाको अवधिमा झण्डै साढे ५ करोड रुपैयाँ बराबरको अवैध सामग्री बरामद गरेको छ ।

सीमा सुरक्षा, सीमा अपराध, अवैध ओसारपसारविरुद्ध र शान्ति सुरक्षा लगायतका कार्य गर्दै आएको सशस्त्र प्रहरी बलले पश्चिम नवलपरासीदेखि बर्दियासम्मको लामो सीमा भएको लुम्बिनी प्रदेशमा गरेको अवैध तस्करी विरुद्धको कारबाहीमा ५ करोड ३९ लाख १० हजार ९५७ रुपैयाँ बराबरको अवैध सामग्री बरामद गरेको सशस्त्र प्रहरी बल नं. ५ विन्ध्यावासिनी बाहिनी रुपन्देहीका सहायक बाहिनीपति तथा सूचना अधिकारी एसएसपी कमल प्रसाद तिउसीनाले जानकारी दिएका छन् । बरामद गरिएको सबै अवैध सामग्री आबश्यक कारबाहीका लागि सम्बन्धित जिल्लाका भन्सार कार्यालयमा बुझाइएको तिउसीनाले बताए ।

लुम्बिनी प्रदेशमा अबैध चोरी निकासी पैठारी नियन्त्रणमा सक्रियरुपले अगाडि बढेको सशस्त्र प्रहरीको फागुन १ गते चैत १७ सम्मको बरामदी विवरणमा सबैभन्दा अगाडि बाँके जिल्ला रहेको छ । बाँकेस्थित सशस्त्र प्रहरी नं. ३० गण बागेश्वरी बाँकेले डेढ महिनाको अवधिमा १ करोड ७७ लाख ९ हजार २०१ रुपैयाँ बराबरको अवैध सामग्री बरामद गरेको छ । बाँकेमा हाल सशस्त्र प्रहरी प्रमुखमा एसपी शोभाकान्त खनाल छन् ।

त्यसैगरी दोस्रोमा रहेको रुपन्देहीस्थित सशस्त्र प्रहरीले १ करोड ४२ लाख ३१ हजार ८० रुपैयाँ बराबरको अवैध तस्करीको सामग्री बरामद गरेको एसएसपी तिउसीनाले बताए । हाल त्यहाँस्थित सशस्त्र प्रहरी बल नं. २७ गणको एसपी मेखराज जोशीले कमाण्ड सम्हाल्दै आएका छन् ।

कपिलवस्तुस्थित सशस्त्र प्रहरी बल नं. २८ गणले पनि डेढ महिनाको अवधिमा राम्रो परिमाणमा अवैध सामग्री बरामद गरेको छ। फागुन १ देखि चैत १७ गतेसम्मको अवधि कपिलवस्तु सशस्त्र प्रहरीले ९८ लाख ५६ हजार ३०७ रुपैयाँ बराबरको सामग्री बरामद गरेको हो । तेस्रो स्थानमा रहेको कपिलवस्तु सशस्त्र प्रहरीको नेतृत्व एसपी नेत्र केसीले गरिरहेका छन् ।

त्यस्तै लुम्बिनी प्रदेशको सबैभन्दा पूर्वी जिल्ला पश्चिम नवलपरासीस्थित सशस्त्र प्रहरी चौथोमा रहेको छ । सोही अवधिमा पश्चिम नवलपरासीबाट ८४ लाख ७५ हजार ५७० रुपैयाँ बराबरको अवैध सामग्री सशस्त्र प्रहरीले बरामद गरेको सूचना अधिकारी तिउसीनाले जानकारी दिए । उनका अनुसार त्यहाँको सशस्त्र प्रहरी बल नं. २६ गणको कमाण्ड एसपी सन्तोष रायमाझीले गर्दै आएका छन् ।

यसैगरी लुम्बिनी प्रदेशको सबैभन्दा पश्चिममा रहेको बर्दियाबाट सशस्त्र प्रहरी बल नं. ३१ गणले गत फागुन १ देखि चैत १७ गतेको अवधिमा ३१ लाख ८२ हजार ३७२ रुपैयाँ बरामदको सामग्री गरेको छ । हाल सशस्त्र प्रहरी बर्दियाको नेतृत्व एसपी मान बहादुर शाहीले गर्दै आएका छन् ।

कोइलाबास गढवा एउटा मात्रै नाका रहेको दाङबाट सशस्त्र प्रहरीले ४ लाख २२ हजार ४२७ रुपैयाँ बराबरको अवैध सामग्री बरामद गरेको विन्ध्यावासिनी बाहिनीले जानकारी दिएको छ । त्यहाँ स्थित सशस्त्र प्रहरी बल नं. २९ ज्वालामाई गण भालुबाङको कमाण्ड एसपी मनोज धितालले गरिरहेका छन् ।

एसएसपी तिउसीनाले दिएको जानकारी अनुसार प्रदेशभर सशस्त्र प्रहरीले 'सीमावासीसँग सशस्त्र प्रहरी' कार्यक्रम अन्तर्गत विभिन्न कार्यक्रम गर्दै आइरहेको छ ।

प्रकाशित मिति: मंगलबार, चैत १९, २०८१ १५:०३

प्रतिक्रिया दिनुहोस्