'शक्तिपीठ बागेश्वरी पुस्तक' विमोचन

संस्कृति-साहित्य

गृहपृष्ठ
संस्कृति-साहित्य
'शक्तिपीठ बागेश्वरी पुस्तक' विमोचन

'शक्तिपीठ बागेश्वरी पुस्तक' विमोचन

शनिबार, जेठ १०, २०८२ बागेश्वरी पोस्ट

नेपालगञ्ज । पश्चिम नेपालको चर्चित शक्तिपीठ बागेश्वरी मन्दिरबारे लेखिएको 'शक्तिपीठ बागेश्वरी पुस्तक' को विमोचन गरिएको छ । बागेश्वरी मन्दिरको विषयमा लेखिएको यो दोस्रो पुस्तक हो । बागेश्वरी गुठी व्यवस्थापन समिति नेपालगञ्जले 'शक्तिपीठ बागेश्वरी' नामक पुस्तक प्रकाशित गरेको हो । यसअघि संस्कृतिविद् डा. राजकुमार सुवेदीले २०५३ सालमै 'बागेश्वरी मन्दिर परिचय' नामक पुस्तक प्रकाशित गरेका थिए ।

समितिका अध्यक्ष तथा प्रतिनिधिसभा सदस्य डा. धवल शम्शेर राणा, नेपाल प्रज्ञा प्रतिष्ठानका पूर्व सदस्य सचिव सनत रेग्मी लगायतले शनिबार नेपालगञ्जमा पुस्तक विमोचन गरेका हुन् । पत्रकार शंकर प्रसाद खनाल सम्पादक रहेको पुस्तकमा बागेश्वरी मन्दिरकोे इतिहास, मन्दिर पुनर्निर्माण, मन्दिर परिसरका सम्पदा, मन्दिरको महिमा, सम्पत्ति, मन्दिरमा सुधारका लागि गुठी समिति र कानुनी प्रयास, महन्त र पूजा परम्परा, महाआरतीका विषयमा लेख समेटिएका छन् । १७२ पृष्ठको पुस्तकमा बागेश्वरीको जग्गा, अदालतका आदेश, छानबिन समितिका प्रतिवेदनहरु, लिखत, निर्णयहरु, मन्दिर अंकित हुलाक टिकट, सिक्का, मिडियाका समाचार, पुस्तकको अनुसूचीमा राखिएको छ ।

पुस्तक विमोचन समारोहमा समितिका अध्यक्ष डा. राणाले मन्दिरलाई देश विदेशमा चिनाउन मन्दिरबारे पुस्तक र पुस्तिका प्रकाशित गरिएको बताए । सो अवसरमा बागेश्वरी मन्दिर गुठी व्यवस्थापन समितिका सचिव गोपालप्रसाद अधिकारीको सांगठनिक प्रतिवेदन र कोषाध्यक्ष मधुसूधन शर्माको आर्थिक प्रतिवेदन प्रस्तुत गरिएको थियो । कार्यक्रममा सरोकारवालाहरुले मन्दिरको सम्पत्ति, व्यवस्थापन, पुस्तक र प्रतिवेदनमा सुधारका लागि सुझाव दिएका थिए ।

प्रकाशित मिति: शनिबार, जेठ १०, २०८२ २१:४५